ہونڈا کا گاڑیوں کے بعد جدید 'ایلیٹ طیارہ' متعارف

ہوسکتا ہے کہ آپ کو علم نہ ہو مگر ہونڈا موٹرسائیکلیں، گاڑیاں، جنریٹر اور 9 ہزار کے قریب دیگر اشیاء کے علاوہ ہوائی طیارے بھی تیار کرتی ہے جس کے لیے کمپنی کی ذیلی شاخ کو ہونڈا جیٹ کا نام دیا گیا اور اس نے اب اپنا سب سے بہترین طیارہ متعارف کرایا ہے۔
 

ڈان کے مطابق اس طیارے کو ایلیٹ کا نام دیا گیا ہے اور کمپنی کے مطابق یہ انتہائی سستا اور ایندھن کی بچت کرنے والا ہے۔

کمپنی کے مطابق سابقہ ماڈلز کے مقابلے میں یہ طیارہ ایندھن کی 17 فیصد بچت کرنے کی صلاحیت رکھتا ہے۔

یہ طیارہ فل ٹینک کے ساتھ 1427 ناٹیکل میل سفر کرسکتا ہے، جو کہ پہلے کے مقابلے میں 17 فیصد زیادہ ہے۔
 

اضافی فیول گنجائش اور ایروڈائنامک بہتری کی بدولت اس طیارے کو اڑان بھرنے یا لینڈ کرنے کے لیے کم رن وے کی ضرورت پڑتی ہے۔

اور یہ کمپنی کا سب سے تیز اور خاموش ترین طیارہ بھی ہے جبکہ کیبین فیچرز بھی کافی مناسب ہیں۔

اس طیارے میں زیادہ تر اپ ڈیٹس avionic سسٹم میں کی گئی ہیں یعنی نیا آٹو پائلٹ سسٹم، پرفارمنس منیجمنٹ، سافٹ وئیر ٹیک آف اور لینڈنگ ڈسٹن منیجمنٹ وغیرہ۔

ہونڈا نے فی الحال اس کی قیمت کی تفصیلات بیان نہیں کی، کیونکہ یہ رواں سال کی تیسری سہ ماہی کے دوران فروخت کے لیے دستیاب ہوگا۔
 

تاہم اس سے پہلے کے ماڈل کی قیمت 4.85 ملین ڈالرز سے شروع ہوتی تھی تو ایلیٹ کو بھی 5 ملین ڈالرز یا اس سے زائد پر ہی فروخت کیا جائے گا۔