الیکشن 2018: کئی نامور سیاسی شخصیات کو شکست

متعدد جماعتوں کی جانب سے دھاندلی کے الزامات سے قطع نظر ملک کے 11ویں عام انتخابات میں کئی حیرت انگیز نتائج دیکھنے میں آئے جس میں بڑی بڑی سیاسی شخصیات کو ان کے روایتی حلقوں سے شکست کا ذائقہ چکھنا پڑا۔
 

ڈان اخبار کے مطابق الیکشن کمیشن آف پاکستان کے جاری کردہ نتائج کے مطابق پاکستان تحریک انصاف (پی ٹی آئی) کے چیئرمین عمران خان نے 5 حلقوں سے انتخابات میں حصہ لیا اور پانچوں نشستوں پر میدان مار لیا۔دوسری جانب جمیعت علمائے اسلام (ف) کے سربراہ مولانا فضل الرحمن اور پاکستان پیپلز پارٹی (پی پی پی) کے چیئرمین بلاول بھٹو زرداری اپنی روایتی نشستیں ہی ہار گئے۔

پی پی پی کے چیئرمین نے پہلی مرتبہ الیکشن لڑا اور 3 حلقوں سے انتخابات میں حصہ لیا، جس میں مالاکنڈ سے قومی اسمبلی کے حلقہ این اے-8 سے پی ٹی آئی کے جنید اکبر نے انہیں شکست دی۔سب سے بڑا اپ سیٹ انہیں پیپلزپارٹی کا گڑھ سمجھے جانے والے علاقے لیاری کے حلقہ این اے-246 سے ملا جہاں پی ٹی آئی کے شکور شاد ان کے مقابلے میں بازی جیت گئے۔تاہم بلاول بھٹو آبائی حلقے لاڑکانہ کے آبائی حلقے این اے-200 سے متحدہ مجلس عمل (ایم ایم اے) کے راشد سومرو کو ہرا کر کامیاب رہےدوسری جانب جے یو ائی ایف کے مولانا فضل الرحمٰن اپنے آبائی حلقے ڈیرہ اسماعیل خان این ے-39 سے ہی ہار گئے۔
 

ان کے علاوہ عوامی نیشنل پارٹی(اے این پی) کے سربراہ اسفند یار ولی چارسدہ کے اپنے آبائی حلقے این اے-24 میں پی ٹی آئی کے فضل محمد خان سے 23 ہزار ووٹوں کے فرق سے ہارے۔پاکستان مسلم لیگ (ن) کے صدر میاں شہباز شریف بھی 4 نشستوں میں سے بمشکل لاہور کی نشست پر کامیاب ہوسکے، باقی کراچی، سوات اور ڈیرہ غازی خان سے انہیں بھی شکست کا سامنا کرنا پڑا۔مسلم لیگ (ن) کے ہی ایک اور رہنما اور سابق وفاقی وزیر سردار اویس احمد لغاری کو ان کے آبائی حلقے میں پی ٹی آئی کی زرتاج گل کے ہاتھوں شکست ہوئی۔

اسی فہرست میں جماعت اسلامی کے امیر سینیٹر سراج الحق کا نام بھی شامل ہے، جو لوئر دیر کے علاقے کی روایتی نشست پر اپنے حریف پی ٹی آئی کے محمد بشیر کے ہاتھوں ہار ے، ان کے ووٹوں کا فرق تقریباً 20 ہزار رہا۔ادھر چوہدری نثار علی خان جو 1985 سے مسلسل قومی اسمبلی کا حصہ تھے، 33 سال بعد انتخابات میں ناکام رہے، انہوں نے حلقہ این اے-59 اور 63 سے الیکشن میں حصہ لیا اور دونوں ہی نشستوں پر انہیں تحریک انصاف کے غلام سرور خان نے شکست دی۔واضح رہے کہ چوہدری نثار پہلی مرتبہ آزاد حیثیت سے جیپ کے نشان پر الیکشن لڑ رہے تھے، ان کے علاوہ سابق وزیر اعظم شاہد خاقان عباسی نے بھی 2 حلقوں سے انتخاب لڑا اور دونوں ہی میں ناکامی کا سامنا کیا، انہیں اسلام آباد میں عمران خان جبکہ مری سے پی ٹی آئی کے صداقت عباسی نے ہرایا۔