عمران خان 176 ووٹ لے کر پاکستان کے نئے وزیراعظم منتخب

پاکستان تحریک انصاف کے سربراہ عمران خان ملک کی نومنتخب قومی اسمبلی میں ہونے والے قائدِ ایوان کے انتخاب میں 176 ووٹ لے کر ملک کے 22ویں وزیراعظم منتخب ہو گئے ہیں۔

ان کے مدمقابل مسلم لیگ نون کے صدر شہباز شریف کو 96 ووٹ ملے جبکہ اپوزیشن کی اتحادی جماعت پیپلز پارٹی کے ارکان نے ووٹنگ کے عمل میں حصہ نہیں لیا۔
 

اسپیکر اسد قیصر کی جانب سے عمران خان کی کامیابی کے اعلان کے ساتھ ہی ایوان میں تحریکِ انصاف اور مسلم لیگ (ن) کے ارکانِ اسمبلی کے درمیان نعرے بازی کا مقابلہ شروع ہو گیا۔

عمران خان کا ایوان سے خطاب
عمران خان نے وزیراعظم منتخب ہونے کے بعد شدید نعرے بازی میں ایوان سے خطاب میں قوم کا شکریہ ادا کیا۔

عمران خان کا کہنا تھا کہ 'میں اللہ کا سب سے پہلے شکریہ ادا کرتا ہوں۔ جس نے موقع دیا پاکستان میں تبدیلی لانے کا جس تبدیلی کے لیے یہ قوم 70سال سے انتظار کر رہی تھی۔'

انھوں نے کہا کہ 'قوم سے وعدہ کرتا ہوں کہ جو تبدیلی ہم لے کر آئیں گے یہ قوم ترس رہی تھی اس تبدیلی کے لیے ۔ سب سے پہلے کڑا احتساب کرنا ہے۔ جن لوگوں نے ملک کو لوٹا اور مقروض کیا ایک ایک آدمی کو نہیں چھوڑوں گا۔'

ان کا کہنا تھا کہ ' کسی قسم کا این آر او کسی کو نہیں ملے گا۔ 22 سال کی جدوجہد کے بعد یہاں پہنچا ہوں اور مجھے کسی فوجی آمر نے پالا نہیں تھا۔'

عمران خان کا کہنا تھا کہ 'جنھوں نے ہمارے بچوں کا مستقبل لوٹا میں ایک ایک آدمی کو انصاف کے کٹہرے میں لاؤں گا۔ نہ میرے والد سیاست میں تھا نہ مجھے کسی ملٹری ڈکٹیٹر نے پالا۔ ایک لیڈر تھا جو میرا ہیرو تھا وہ قائداعظم محمد علی جناح تھے۔'

ایوان میں ہنگامہ آرائی
مسلم لیگ ن کے اراکین ڈائس اور عمران خان کی نشست کے سامنے جمع ہو کر ’ووٹ کو عزت دو‘ اور شہباز شریف کے حق میں نعرے لگاتے رہے جس کے جواب میں تحریکِ انصاف کے ارکان نے بھی وزیراعظم عمران خان کے نعرے لگائے۔

سپیکر اسمبلی نے اجلاس میں 15 منٹ کا وقفہ دے دیا۔

ادھر ملک بھر میں تحریک انصاف کے حامی عمران خان کے وزیراعظم منتخب ہونے پر مٹھائیاں تقسیم کر رہے ہیں اور خوشی سے بھنگڑے ڈالے رہے ہیں۔

اس احتجاج میں پیپلز پارٹی کے ارکان شریک نہیں تھے اور وہ وزیراعظم کے انتخاب کے بعد بلاول بھٹو کی قیادت میں ایوان سے باہر چلے گئے۔

اس سے قبل جمعے کو جب اجلاس شروع ہوا تو اپوزیشن اراکین نے اپنی نشستوں پر کھڑے ہو کر گیلریوں میں موجود غیرمتعلقہ افراد کی موجودگی پر تنقید کی۔

پیپلز پارٹی کے رہنما سید خورشید شاہ نے کہا کہ انھوں نے 30 سال کے اندر ایسی صورتحال نہیں دیکھی۔ انھوں نے سپیکر کو مخاطب ہو کر کہا کہ ’یہ جو گیٹ پر لوگ کھڑے ہیں، رول نمبر24 پڑھ لیں آپ دیکھ لیں، یہ خالی کروائیں اس سے پہلے ایک واقعہ ہو چکا ہے۔۔۔۔‘

سپیکر اسمبلی نے ایوان میں موجود سارجنٹس سے کہا کہ وہ گیلریز کو خالی کروائیں۔

اس کے بعد سپیکر نے اجلاس کے آغاز پر انتخاب کے قواعد پڑھ کر سنائے جس کے بعد ارکان اسمبلی اپنے اپنے پسندیدہ امیدوار کی لابی میں چلے گئے۔ عمران خان کے حامی لابی نمبر اے میں گئے جبکہ شہباز شریف کے حامی لابی نمبر بی میں اکھٹے ہوئے۔