دنیا کے معروف کرکٹرز اور ان کا سیاسی کیریئر

ورلڈ کپ فاتح کپتان عمران خان جمعہ کو پارلیمنٹ سے پاکستان کے 22ویں وزیراعظم منتخب ہو چکے ہیں اور آج انہوں نے اپنے نئے عہدے کا حلف بھی اٹھا لیا ہے۔ عمران خان کو یہ اعزاز بھی حاصل ہے کہ وہ وزارت عظمٰی تک پہنچنے والے دنیا کے پہلے ٹیسٹ کرکٹر ہیں۔ عمران خان کے علاوہ دنیا کے کئی اور معروف کرکٹرز بھی سیاست کی دنیا میں قدم رکھ چکے ہیں- اسی حوالے سے ہم یہاں چند معروف کرکٹرز اور ان کے سیاسی کیریئر کا ذکر کریں گے-

سری لنکا کے سنتھ جے سوریا وہ واحد کرکٹر ہیں جو کرکٹ کھیلنے کے ساتھ اسمبلی ممبر اور پوسٹل سروس کے نائب وزیر بھی رہ چکے ہیں۔ اس کے علاوہ سری لنکا کے ورلڈ کپ فاتح کپتان ارجنا رانا تنگا نے بھی ریٹائرمنٹ کے بعد سیاست میں حصہ لیا اور انڈسٹریز، ٹورزم کے ڈپٹی منسٹر کے عہدے تک پہنجے۔

پاکستان کے فاسٹ بولر سرفراز نواز نے 1988 میں پیپلز پارٹی کی جانب سے دیے گئے ٹکٹ پر انتخابات میں حصہ لیا تاہم وہ چار سو ووٹ سے ہار گئے۔ معروف پاکستانی کرکٹرز عامرسہیل نے پی ایم ایل نون اور سلیم ملک نے بھی پی ایم ایل ق جوائن کی تھی۔

بھارت کے سابق کپتان اظہرالدین مراد آباد سے الیکشن جیت کر کانگریس کے رکن پارلیمنٹ بنے جبکہ نوجوت سنگھ سدھو نے امرتسر سے 2004 میں بی جی پی کی ٹکٹ پر جیتے مگر ایک کیس میں سزا کے بعد مستعفی ہوئے اور سپریم کورٹ سے کلیئر ہو کر دوبارہ انتخاب لڑا اور کانگریسی امیدوار کو شکست دی۔

ایلک ڈگلس ہوم دس فرسٹ کلاس میچز کھیلنے والے انگلینڈ کے واحد وزیراعظم ہیں۔ دلچسپ بات یہ ہے کہ ڈگلس ہوم نے 363 رنز بنائے اوروہ اتنے ہی دن انگلینڈ کے وزیراعظم بھی رہے۔ اس کے علاوہ ٹیڈڈیکسٹر 1964 کی ایشیز سیریز میں انگلینڈ کے کپتان تھے۔ وہ الیکشن کے لیے کپتانی سے دستبردار ہوئے لیکن انہیں شکست کا سامنا کرنا پڑا-