اڑن طشتریوں کے لیے “ لینڈنگ پیڈ “ کی تعمیر کس کے حکم پر؟

ارجنٹینا کے صحرا کے وسط میں ایک شخص نے اڑن طشتریوں کے زمین پر اترنے کے لیے “ landing pad “ تعمیر کیا ہے- اور اس شخص کا دعویٰ ہے کہ اسے اس “ لینڈنگ پیڈ “ کی تعمیر کی ہدایات خود خلائی مخلوق نے دی تھیں-

یہ لینڈنگ پیڈ سفید اور براؤن رنگ کے پتھروں کی مدد سے ایک ستارے کی شکل میں تعمیر کیا گیا ہے اور اسے 'ovniport' کا نام دیا گیا ہے- اڑن طشتریوں کے لیے یہ یہ لینڈنگ پیڈ ارجنٹینا کے صوبے سالٹا کے قصبے Cachi میں واقع ہے-
 

واضح رہے کہ یہ صحرا گزشتہ چند دہائیوں سے اڑن طشتریوں کے حوالے سے دنیا بھر میں مشہور ہے- یہاں سے متعدد بار اڑن طشتریوں کو دیکھے جانے یا نامعوم اشیاﺀ کی پرواز اور غیر واضح نظاروں کے حوالے سے خبریں موصول ہوئی ہیں-

اس انوکھے کام کو سرانجام دینے والا شخص سوئس باشندہ ہے اور اسے Werner Jaisli کے نام سے جانا جاتا ہے-

اس لینڈنگ پیڈ کو دیکھنے لیے لوگوں کی ایک بڑی تعداد اس مقام پر آرہی ہے اور یہ کوئی حیرانی کی بات بھی نہیں ہے کیونکہ اس لینڈنگ پیڈ کا انتہائی شاندار انداز میں ڈیزائن کیا گیا ہے- اس کی خوبصورتی کا اندازہ آپ یہاں دی گئی ان تصاویر سے بھی لگا سکتے ہیں جو فضا سے لی گئی ہیں-
 

لینڈنگ پیڈ کی تعمیر کے حوالے سے Jaisli کا کہنا ہے کہ انہیں خلائی مخلوق کی جانب سے “ ٹیلی پیتھک “ پیغامات موصول ہوئے تھے جس میں کہا گیا تھا کہ انہیں زمین پر ایک ایسے مقام کی ضرورت ہے جہاں وہ اپنی اڑن طشتری اتار سکیں-

Jaisli نے ارجنٹینا کے اخبار El Tribuno کو بتایا کہ “ سال 2008 میں ایک اڑن طشتری آئی تھی جو کہ ہمارے سر 100 میٹر کی بلندی پر تھی اور اس سے انتہائی تیز روشنی نکل رہی تھی- اس کی خاص قسم کی تیز روشنی میں ہم ایک دوسرے کو دیکھ سکتے تھے“-

“ دلچسپ بات یہ ہے کہ اتنی زیادہ روشنی نے آنکھوں پر کوئی اثر نہیں کیا- البتہ اس وقت میرے دماغ نے ابلنا شروع کردیا- خلائی مخلوق نے ٹیلی پیتھک کے ذریعے مجھے ائیرپورٹ کی تعمیر کا حکم دیا“-

Jaisli کے مطابق انہوں نے اسی وقت سے ایک ایسے ستارے پر کام شروع کردیا جس کے 36 کونے ہیں اور اس قطر 48 میٹر ہے-