کرکٹ کی تاریخ کے “ہائی ٹینشن میچز“ اور تنازعات

پاکستان اور بھارت کے درمیان کرکٹ کے میچز ہمشیہ سے ’’ہائی ٹینشن‘‘ ماحول میں کھیلے گئے۔ یہ بات قابل ذکر ہے پاکستان کرکٹ ٹیم کو انٹرنیشنل کرکٹ کونسل کی جانب سے ٹیسٹ اسٹیٹس دلوانے میں بھارتی کرکٹ بورڈ نے کافی مدد کی لیکن بھارتی شائقین کو اپنی ٹیم کی ہار برداشت نہیں ہے۔ اکتوبر 1952ء میں پاکستان ٹیم نے بھارت کا دورہ کیا اور ڈبیو ٹیسٹ بھارت کے خلاف دہلی کے فیروز شاہ کوٹلہ اسٹیڈیم میں کھیلا۔ پاکستان اور بھارت کے مابین کھیلا جانے والا یہ پہلا میچ انتہائی سنسنی خیز رہا۔ کرکٹ کے ناقدین کی رائے تھی پاکستانی ٹیم ’’بے بی آف ٹیسٹ کرکٹ ’’ کی حیثیت رکھتی ہے جب کہ بھارتی کرکٹ ٹیم کا شمار دنیا کی مضبوط ٹیموں جب کہ اس کے کھلاڑیوں کا شمار قدآور کھلاڑیوں میں ہوتا ہے۔ اس کے کئی کھلاڑی برطانوی دور حکومت میں انگلش ٹیم کی جانب سے کھیلتے رہے تھے۔ اسے ٹیسٹ اسٹیٹس 1932میں حاصل ہوا تھا اور اسی سال اس کی ٹیم نے انگلینڈ کا دورہ کیا۔
 

آزادی کے بعد بھارتی ٹیم نے پہلی ٹیسٹ سیریز 1948ء میں آسٹریلیا کے خلاف برسبین میں کھیلی۔ آسٹریلین ٹیم کی قیادت سرڈان بریڈمین اور بھارت کے کپتان لالہ امرناتھ تھے۔چند ماہ قبل ہی اس نے مدراس ٹیسٹ میں انگلینڈ کو شکست دے کر فتح حاصل کی تھی، اس لیے پاکستانی کرکٹر اس کا مقابلہ نہیں کرسکیں گے۔دہلی میں کھیلے جانے والے پہلے ٹیسٹ میچ میں پاکستانی کے پندرہ بلے باز دوہرے ہندسے تک پہنچے بغیر آؤٹ ہوگئے۔ونو مینکڈ نے 13 پاکستانی بلے بازوں کو پویلین واپس بھیجا۔اس کے تین روز بعد لکھنؤ میں دوسرا ٹیسٹ میچ شروع ہوا، جو نہ صرف کرکٹ کے ماہرین کے لیے ’’ہائی وولٹیج ‘‘ میچ ثابت ہوا بلکہ شائقین کو بھی اس میچ کے نتیجے سے ذہنی جھٹکے لگے۔ دہلی ٹیسٹ میں اسکول کی ٹیم کی سی کارکردگی دکھانے والی پاکستانی ٹیم کے کھلاڑی لکھنؤ کے یونیورسٹی گراؤنڈ پر ایک نئے عزم کے ساتھ میدان میں اترے اور انہوں نے حیران کن کھیل پیش کیا۔اس میچ میں نذر محمد نے پاکستان کی تاریخ کی پہلی سنچری اسکور کی جب کہ فضل محمود نے اپنی خطرناک سوئنگ گیندوں سے بھارتی بیٹنگ لائن کو تہس نہس کردیا۔ انہوں نے دونوں اننگز میں 12 وکٹیں لیں ، نذر محمد کو اس میچ میں یہ بھی منفرد اعزاز حاصل ہوا کہ وہ بیٹنگ اور فیلڈنگ کر کے ٹیسٹ میچ کے تمام دن میدان میں موجود رہنے والے دنیا کے پہلے کرکٹر بن گئے۔بھارت کو اس میچ میں ایک اننگ اور 43رنز سے شکست دے کر کرکٹ کی تاریخ کا عظیم کارنامہ انجام دیا۔ پاکستان کی فتح نے بھارتی تماشائیوں پر بجلی گرا دی اور وہ میچ ختم ہوتے ہی گراؤنڈ میں داخل ہوگئے اور نعرے بازی کرتے ہوئے ہنگامہ آرائی شروع کردی جس کی وجہ سے انتظامیہ کو پولیس طلب کرنا پڑی۔

1984ء میں یھارتی کرکٹ ٹیم نے پاکستان کا دورہ کیا ، پہلا میچ کوئٹہ کے ایوب نیشنل اسٹیڈیم میں کھیلا گیا، جسے میزبان ملک نے جیتا۔ دوسرا ٹیسٹ میچ جو 31 اکتوبر 1984 کو جناح اسٹیڈیم سیالکوٹ میں منعقد ہوا، بھارتی ٹیم کے لیے ہائی ٹینشن میچ ثابت ہوا۔ پاکستان نے ٹاس جیت کر بھارت کو بیٹنگ کی دعوت دی۔ میچ کا پہلا دن تھا اور بھارت کے تین بلے باز آؤٹ ہوکر پویلین واپس جاچکے تھے جب کہ پانچویں نمبر پر آنے والے روی شاستری اور دلیپ وینگ سرکار بیٹنگ کر رہے تھے اور سنچری بنانے کے قریب تھے کہ میچ کے دوران ہی اسٹیڈیم میں بھارتی وزیر اعظم مسز اندرا گاندھی کے قتل کی خبر پہنچی۔ بھارتی آفیشلز نے مبچ رکوا کر بھارتی کھلاڑیوں کو واپسی کا اشارہ کیا۔ اسی روز بھارتی ٹیم اپنا دورہ ادھورا چھوڑ کر وطن واپس روانہ ہوگئی۔
 

چند سال قبل ایک دوستانہ کرکٹ میچ ہندو مسلم فسادات میں تبدیل ہوگیا۔بھارتی ریاست گجرات کے قصبے’’ ویرامگام ‘‘ مسلمان لڑکے ایک دوستانہ میچ کھیل رہے تھے کہ بیٹس مین کا ایک اونچا شاٹ مندر میں جاکر گرا۔ جب لڑکے مندر میں گیند لینے گئے تو وہاں موجود پجاریوں سے ان کی تلخ کلامی ہوگئی جو ہاتھاپائی کے بعد ہندو مسلم فساد میں بدل گئی جس میں دونوں فریقین کے تقریباً تین افراد ہلاک اور کئی زخمی ہوگئے۔ ویرامگام کے واقعے کی خبر سن کر دوسرے علاقوں میں بھی ہندو مسلم فسادات پھوٹ پڑ جن میں مسلمانوں کی نو دکانوں کو نذر آتش کر دیا گیا۔پولیس کو صورت حال پر قابوپانے کے لیے آنسو گیس استعمال کرنا پڑی لیکن ناکامی کے بعد متاثرہ علاقوں میں کرفیو نافذ کردیا گیا۔

1979ء میں پاکستان اور آسٹریلیا کے درمیان کھیلا جانے والا میچ، کینگروز ٹیم کے لیے ہائی ٹینشن میچ بن گیا۔پاکستانی ٹیم دو میچوں کی ٹیسٹ سیریز کھیلنے کے لیے آسٹریلیا کے دورے پر پہنچی۔ پہلا میچ 10 سے 15مارچ کے درمیان ملبورن کرکٹ گراؤنڈ پر کھیلا گیا۔پاکستان نے پہلے بیٹنگ کرتے ہوئے پہلی اننگز میں 196 رنز بنائے۔اس اننگ میں کینگروز بالرز ایلن ہرسٹ اور روڈنی ہوگ نے بہترین بالنگ کا مظاہرہ کرتے ہوئے پاکستانی ٹیم کو معمولی اسکور پر آؤٹ کیا۔جواب میں پاکستان نے آسٹریلین بلے بازوں کو کھل کر نہیں کھیلنے دیا اور انہیں 168 رنز تک محدود رکھا۔اس اننگ میں فاسٹ بالر، عمران خان نے چار جب کہ سرفراز نواز اور وسیم راجہ نے دو دو وکٹیں حاصل کیں۔ دوسری اننگز میں پاکستان بلے بازوں نے بہتر کارکردگی کا مظاہرہ کیا۔ جواب میں آسٹریلوی بلے بازوں نے بھی جارحانہ بلے بازی کرتے ہوئے ہدف کو 300سے زیادہ رنز پر پہنچا دیا اور بہ ظاہر ہوں لگ رہا تھا کہ میزبان ملک میچ جیت جائے گا لیکن اس موقع پر سرفراز نواز نے سوئنگ اور ریورس سوئنگ باؤلنگ کا ایسا جادو چلایا کہ آسٹریلوی بلے باز بالکل بے بس ہو گئے اور یکے بعد دیگرے آؤٹ ہونے لگے۔سرفراز نے 86 رنز کے عوض 9 کھلاڑیوں کو پویلین کی راہ دکھائی۔اسی میچ کے دوران انہوں نے دوسرا کارنامہ اسی سپیل میں ایک رن دے کر سات کھلاڑیوں کو آؤٹ کرنے کا انجام دیا۔ کرکٹ کے بڑے بڑے نقاد اس ٹیسٹ میچ کو تاریخ کے عظیم ترین ٹیسٹ میچوں میں شمار کرنے پر مجبور ہو گئے۔