یہ کھاؤ گی تو مچھلی کے منہ والا بچہ پیدا ہوگا، چند ایسے کام جن سے حاملہ خواتین کو روکنا سمجھ سے باہر ہے

ایک مشہور قول ہے جس میں دعویٰ کیا جاتا ہے کہ اگر حاملہ خاتون اپنی غذا سے مطمئین نہیں ہوتی اور وہ خود کو نوچتی ہے تو اس کا مطلب ہے اس کا بچہ اپنے جسم پر اس غذا کے پیدائشی نشان لے کر پیدا ہوگا جس کی اس خاتون کو خواہش تھی- جبکہ دنیا کی کچھ ثقافتوں میں حاملہ خواتین کے لیے بہت سی کھانے پینے کی اشیاﺀ پر پابندی عائد ہے- آج کے آرٹیکل میں چند ایسی ہی باتوں کا ذکر ہے جن سے حاملہ خواتین کو روکا جاتا ہے یا پھر انہیں کرنے کو کہا جاتا ہے- تاہم ان باتوں کی حقیقت آج تک واضح نہیں ہے-

کچا انڈہ

فلپائن میں حاملہ خواتین کو عین ڈلیوری سے قبل کچا انڈہ کھانے کو کہا جاتا ہے- اس کی وجہ یہ قرار دی جاتی ہے کہ کچا انڈہ کھانے سے ڈلیوری کا عمل آسان ہوجاتا ہے-

انڈہ کھانے پر پابندی

میکسیکو کی پرانے وقتوں کی خواتین کا ماننا ہے کہ اگر حاملہ خاتون انڈہ کھائیں تو پیدا ہونے والے بچے کے پاس سے بھی بو آتی ہے-

چوڑیاں پہننا

بھارت کے کچھ حصوں میں حاملہ خواتین کے لیے حمل کے 7 ویں ماہ میں ایک تقریب کا انعقاد کیا جاتا ہے جسے valaikaapu کہا جاتا ہے- اس تقریب میں حاملہ خاتون دونوں ہاتھوں میں چوڑیاں پہنتی ہے- وہاں کے لوگوں کا ماننا ہے کہ چوڑیوں کی آواز سے بچے کے حواس اور دماغ کی سرگرمی تیز ہوتی ہے-

آئس کریم اور مچھلی کھانے پر پابندی

ترکی کے ثقافتی گروپوں کی بعض خواتین حاملہ خواتین کو مچھلی کھانے سے منع کرتی ہیں- ان کا ماننا ہے کہ اگر حاملہ خاتون مچھلی کھائے گی تو اس کا بچہ بھی مچھلی کی شکل سے ملتا جلتا پیدا ہوگا- اسی طرح آئس کریم کھانے سے بھی روکا جاتا ہے اور اس کی وجہ یہ بتائی جاتی ہے کہ بچے کے سر میں سوراخ ہوجائے گا-

کچی مچھلی

امریکہ میں ڈاکٹر حاملہ خواتین کو کچی مچھلی کھانے سے روکتے ہیں کیونکہ ان کے خیال میں نقصان دہ ہوسکتی ہے جبکہ جاپان میں اس کے برعکس کچی مچھلی کو حاملہ خواتین کے لیے ایک صحت بخش غذا تصور کیا جاتا ہے-

نہ مچھلی نہ خرگوش

بلغاریہ میں حاملہ خواتین پر مچھلی اور خرگوش کا گوشت کھانے پر پابندی ہے- ان کا ماننا ہے کہ اگر خرگوش کھائے گی تو بچہ کھلی آنکھوں سے سویا کرے گا اور اگر وہ مچھلی کھائے گی تو بچے کی ناک بند رہے گی اور ہمیشہ خراٹے لے گا-

بستر کے نیچے چھری

چین میں حاملہ خواتین بری روحوں کو دور رکھنے کے لیے اپنے بستر کے نیچے چھری رکھ کر سوتی ہیں جبکہ بعض خواتین بستر کے ساتھ کاغذ ایک ایسا ٹکڑا لٹکاتی ہیں جو قینچی سے مشابہت رکھتا ہے-