چند پاکستانی اسٹیڈیم کے سحر انگیز فضائی مناظر

پاکستان میں 25 سے زائد ایسے نمایاں اسٹیڈیم موجود ہیں جو کرکٹ٬ ہاکی٬ فٹبال اور دیگر کھیلوں کی سرگرمیوں کے لیے استعمال کیے جاتے ہیں- لیکن گزشتہ چند سالوں کے دوران پاکستان میں بین الاقوامی کرکٹ اور دیگر کھیلوں کی سرگرمیاں بری طرح متاثر ہوئی ہیں- یہی وجہ ہے ان اسٹیڈیم کی تزئین و آرائش اور تعمیرِ نو کی جانب بھی ترجیحی بنیادوں پر توجہ نہیں دی گئی- تاہم اگر ہم پرامید رہتے ہوئے پاکستان کے چند مقبول ترین اسٹیڈیم کا فضائی نظارہ کریں تو یہ اب بھی ہمیں خوبصورت اور پرکشش معلوم ہوں گے-

قذافی اسٹیڈیم
یہ پاکستان کا مشہور ترین اسٹیڈیم ہے جو لاہور میں 1959 میں تعمیر کیا گیا- اس اسٹیڈیم میں 60 ہزار افراد کے بیٹھنے کی گنجائش ہے- اس اسٹیڈیم کی دوبارہ تزئین و آرائش سے قبل یہاں صرف 27 ہزار افراد ہی میچ سے لطف اندوز ہو سکتے تھے-

نیشنل ہاکی اسٹیڈیم
یہ اسٹیڈیم بھی پاکستان کے تاریخی شہر لاہور میں واقع ہے- نیشنل ہاکی اسٹیڈیم کو قذافی ہاکی اسٹیڈیم کے نام سے بھی جانا جاتا ہے- یہ دنیا کا سب سے بڑا ہاکی اسٹیڈیم بھی ہے- اس اسٹیڈیم میں 45 ہزار تماشائیوں کے بیٹھنے کی گنجائش ہے-

ایبٹ آباد ہاکی اسٹیڈیم
ایبٹ آباد ہاکی اسٹیڈیم ایبٹ آباد میں واقع ہے اور اس شہر کا سب سے بڑا ہاکی اسٹیڈیم بھی ہے- یہ اسٹیڈیم زیرِ تعمیر ہے جس کی وجہ سے یہاں ابھی تک کوئی بین الاقوامی میچ نہیں کھیلا جاسکا-

جناح اسٹیڈیم
جناح اسٹیڈیم پاکستان کے دارالحکومت اسلام آباد میں واقع ہے اور اسے کئی مقاصد کے لیے استعمال کیا جاتا ہے- زیادہ تر اس اسٹیڈیم میں فٹبال میچز کا انعقاد کیا جاتا ہے- یہ اسٹیڈیم 1970 میں تعمیر کیا گیا تھا اور یہ 2004 میں SAF گیمز کی میزبانی بھی کر چکا ہے- اس اسٹیڈیم میں 48 ہزار تماشائیوں کی گنجائش ہے-

مظفر آباد کرکٹ اسٹیڈیم
یہ کرکٹ اسٹیڈیم آزاد کشمیر کے علاقے مظفر آباد میں واقع ہے- اس مقام کی خوبصورتی دیکھ کر کہا جاسکتا ہے کہ اگر اس اسٹیڈیم کی مناسب دیکھ بھال کی جائے تو یہ دنیا کے خوبصورت ترین اسٹیڈیم میں سے ایک بن سکتا ہے-

قائداعظم کرکٹ اسٹیڈیم
کشمیر کے پہاڑوں اور منگلہ جھیل کے پرکشش نظارے آزاد کشمیر کے علاقے میر پور میں واقع اس اسٹیڈیم کی خوبصورتی میں چار چاند لگا دیتے ہیں- اگر اس کی مناسب تعمیر کی طرف توجہ دی جائے تو یہ اسٹیڈیم بین الاقوامی کرکٹ کو اپنی جانب متوجہ کرسکتا ہے-