کتوں کے لیے پہلی آرٹ نمائش

گھوڑا اور کتا ایسے جانور ہیں جو قدیم دور سے ہی انسانوں کے ساتھ ساتھ رہتے آئے ہیں۔ دونوں ہی انسانوں کے بہت وفادار ہیں۔مسلمانوں نے گھوڑوں کو اپنے ساتھ رکھا ، جنگ ہو یا امن گھوڑا ان کے ساتھ رہا، جنگ میں سوار کے ساتھ دادِ شجاعت دیتے ہوئے اور زمانہ امن میں ایک بہترین سواری کے طور پر گھوڑا ساتھ ساتھ ہوتا تھا۔ فی زمانہ جدید سواریوں کی وجہ سے گھوڑے کی اہمیت کم ہوگئی ہے۔ البتہ کتا ابھی تک انسانوں کے ساتھ موجود ہے۔ بالخصوص اہل مغرب تو کتے کو اپنا رفیق سمجھتے ہیں ،کتے کو اپنے ساتھ رکھنا ان کے معاشرے میں عام ہے بلکہ ایسی مثالیں بھی موجود ہیں کہ مغربی خواتین نے شوہر پر کتے کو ترجیح دی ہے۔
 

جانوروں کے لیے اہل مغرب کی محبت اور ان کے لیے ہمدردی قابل قدر ہے لیکن افسوس کا مقام یہ ہے کہ جانوروں کے حقوق کے لیے آواز اٹھانے والے اہل مغرب مسلمانوں کے قتل عام پر چپ سادھ لیتے ہیں۔ کشمیر، فلسطین، برما اور دیگر خطوں میں ہونے والے مسلمانوں کے قتل عام پر ان کی خاموشی لمحہ ٔ فکریہ ہے۔ جانوروں کی دلجوئی کے لیے لاکھوں روپے خرچ کرنے والے انسانوں کے قتل عام پر چپ رہتے ہیں۔کیا یہ کھلا تضاد نہیں ہے؟