صحت کیلئے چست و تندرست رہنا ہی صحیح ہے ۔ جسم خوبصورت
اور چست ہو تو ایک جانب آپ ایک متاثر کن شخصیت کے مالک نظر آتے ہیں تو
دوسری جانب بیماریاں آپ سے دور بھاگتی ہیں۔
خود کو سلم اور فٹ رکھنے کیلئے بہت سے لوگ ورزش کرتے ہیں تو بہت سے خود پر
کھانا پینا حرام کر بیٹھتے ہیں جبکہ محض صحت سے متعلق غلط عادتوں کو چھوڑ
کر اچھی عادتوں کو اپنانے سے خوبصورت جسامت کا مالک بنا جاسکتا ہے۔
|
|
مثال کے طور پر اپنی غذا کے انتخاب پر توجہ دیتے ہوئے ایسی چیزیں کھائیں جو
نہ صرف جسم کو توانائی پہنچائیں بلکہ انہیں کھا کر وزن بھی نہ بڑھے۔ اچھی
صحت کیلئے ”ناشتہ بادشاہوں جیسا ‘ دوپہر کا کھانا وزیروں جیسا اور رات کا
کھانا فقیروں جیسا “ کی مثال پر عمل کریں۔
3 بار پیٹ بھر کر کھانا کھانے کے بجائے دن بھر میں 6 بار کھائیں لیکن ایک
بار میں کم خوراک لیں۔ رات کے کھانے میں کاربوہائیڈریٹس مثلاً روٹی وغیرہ
نہ لیں۔ کوشش کریں رات کا کھانا ہلکا پھلکا کریں جیسے سلاد‘ دالیں اور گرلڈ
مچھلی ‘وغیرہ۔ اس بات کا خاص خیال رکھیں کہ ایک بار میں کیا اور کتنی مقدار
میں کھا رہے ہیں۔
ڈائٹنگ کا مطلب خود پر بڑھے ہوئے وزن کو لے کر ذہنی دباؤ ڈالنا نہیں بلکہ
صحت کے اصولوں پر عمل کرنا ہے۔ ڈائٹنگ کے دوران بھی مختلف طرح کے کھانے
کھائیں بصورت دیگر ڈائٹنگ آپ کیلئے انتہائی مشکل ہوجائے گی۔
|
|
ضروری ہے کہ غذا کو تبدیل کرتے رہیں مثال کے طور پر اگر ناشتے میں انڈا
کھاتے ہیں تو اسے مختلف انداز میں بنائیں جیسے کہ کبھی آملیٹ بنالیں تو
کبھی اسے ہاف فرائی کر کے کھائیں اور کبھی اسے اُبال کر سبزیوں یا سلاد کے
ساتھ نوش کریں۔ ہفتے میں دو دن انڈا لینے کے علاوہ گندم کی روٹی لے سکتے
ہیں اور ساتھ کسی پھل کا جوس یا شیک بھی لیا جاسکتا ہے۔
دوپہر کے کھانے میں دالیں٬ سبزیاں٬ کباب٬ پالک٬ گندم سے بنا پاستا٬ چاٹ٬
حلیم٬ لال لوبیا یا مرغی کھائی جاسکتی ہے۔ اگر ناشتے میں روٹی کھا چکے ہیں
تو دوپہر میں روٹی یا پاستے سے گریز کریں۔اس بات کا خیال رکھیں کہ آپ کا
کھانا سبزیوں کے تیل میں پکایا گیا ہو۔
رات کے کھانے میں چکن تکہ٬ گوبھی کا رول٬ سوپ، سبزیاں یا دالیں لی جاسکتی
ہیں۔ رات میں سونے سے پہلے ہلکی پھلکی ورزش ضرور کریں۔
|
|
دن میں کئی بار اسنیکس لینے میں کوئی مضائقہ نہیں تاہم بطور اسنیکس پھل٬
تازہ پھلوں کے جوس یا خشک میووں کا انتخاب کریں۔ ایک دن میں تین سے زیادہ
اسنیکس نہ لیں ناشتے ٬دوپہر کے کھانے اور رات کے کھانے کے بعد ایک ٬ ایک
اسنیک لیا جاسکتا ہے۔ رات کے کھانے کے بعد اسنیکس کا استعمال آپ کی خواہش
پر منحصر ہے۔ رات کو کچھ کھانے کی طلب ہو تو تھوڑے سے خشک میوے کھا لیں۔
یوں تو پھل جسم کو طاقت و توانائی پہنچاتے ہیں لیکن کسی بھی چیز کا ضرورت
سے زیادہ استعمال نقصان دہ ہو سکتا ہے۔ پھلوں کی چاٹ بناکر کھانے سے بہتر
ہے کہ ایک بار میں ایک ہی پھل کھائیں۔
|
|
یہ ایک حقیقت ہے کہ ایک بار وزن میں کمی کے بعد ہمیں لگتا ہے کہ اب ہم بغیر
سوچے سمجھے جو چاہیں کھاسکتے ہیں جبکہ یہ ایک غلط خیال ہے۔ وزن برقرار
رکھنے کیلئے ضروری ہے کہ آپ صحت مند غذا پر ہی رہیں ۔یہ امر آپ کے کم ہونے
والے وزن کو قابو میں رکھنے کیلئے انتہائی ضروری ہے۔ |