نیپا کے قریب مین ہول میں گر کر بچے کی ہلاکت کے معاملے پر ذمہ داران کے خلاف مقدمہ درج کرانے کے لیے ڈسٹرکٹ اینڈ سیشن جج شرقی کی عدالت میں درخواست دائر کردی گئی۔
گٹر میں ڈوب کر تین سالہ ابراہیم کی ہلاکت پر ایڈووکیٹ عبدالاحد کی دائر کردہ درخواست میں استدعا کی گئی ہے کہ میئر کراچی اور ٹاؤن چیئرمین گلشن اقبال کے خلاف مقدمہ درج کرنے کا حکم دیا جائے۔
درخواست میں عدالت کو بتایا گیا کہ متوفی بچے کے اہلخانہ نے بلدیاتی اور ضلعی انتظامیہ کے خلاف غفلت کا الزام عائد کیا ہے، نامزد ملزمان اپنی ذمہ داری ادا کرنے میں ناکام رہے ہیں، انفرااسٹرکچر کی مناسب دیکھ بھال نا ہونے کی وجہ سے تین سالہ بچہ جاں سے چلا گیا ہے۔
درخواست میں بتایا گیا کہ ریسکیو اہلکار بھی بروقت موقع پر نہیں پہنچے، اہلخانہ نے بچے کی تلاش کے لیے 15 ہزار روپے خرچ کرکے نجی مشینری بلوائی۔
دائر کردہ درخواست میں کہا گیا ہے کہ نااہل اور کرپٹ حکومت کا خمیازہ شہریوں کو بھگتنا پڑ رہا ہے، پولیس کو نامزد ملزمان کے خلاف مقدمہ درج کرنے کا حکم دینے کی استدعا کی گئی ہے۔