اعلیٰ ثانوی تعلیمی بورڈ نے گورنمنٹ گرلز ہائر سیکنڈری اسکول میمن گوٹھ ملیر میں ہونے والے نقل کے واقعہ کا فوری نوٹس لیتے ہوئے اس امتحانی مرکز کوتبدیل کرنے کا فیصلہ کیا ہے اور گورنمنٹ بوائز اینڈ گرلز ہائر سیکنڈری اسکول حاجی ناتھو ملیر کو نیا امتحانی مرکز بنادیا ہے جس میں وہ تمام امیدوار اپنے باقی رہ جانے والے پرچوں کے امتحان دیں گے جن کا امتحانی مرکز گورنمنٹ گرلز ہائر سیکنڈری اسکول مراد میمن گوٹھ تھا۔ اس ضمن میں بورڈ کی جانب سے جاری کئے گئے اعلامیہ میں کہا گیا ہے کہ نئے امتحانی مرکز میں صبح اور شام دونوں شفٹوں میں شیڈول کے مطابق امتحان ہوگا۔ پریس ریلیز میں مزید بتایا گیا ہے کہ نئے امتحانی مرکز میں نیا عملہ تعینات کیا گیا ہے۔ نیا امتحانی مرکز گورنمنٹ گرلز ہائر سیکنڈری اسکول مراد میمن گوٹھ سے قریب ترین تعلیمی ادارہ ہے تاہم اعلیٰ ثانوی تعلیمی بورڈ نے پیر 4 مئی کو ہونے والے امتحان کے لئے خصوصی طور پر ٹرانسپورٹ کا انتظام کیا ہے تاکہ پہلے دن تمام امیدواروں کو پرانے امتحانی مرکز سے نئے امتحانی مرکز تک پہنچایا جاسکے۔ اس ضمن میں اتوار کے دن بھی انٹربورڈ میں امتحانات سے متعلق اعلیٰ افسران کا اجلاس ہوا جس میں صورتحال کا ازسرنو جائزہ لیتے ہوئے مذکورہ فیصلہ کیا گیا۔ دریں اثناء بورڈ کے چیئرمین پروفیسر انوار احمد زئی اور ناظم امتحانات محمد عمران خان چشتی نے ڈویژنل انتظامیہ او رخصوصاً کمشنر کراچی کا شکریہ ادا کیا ہے جن کی توجہ سے امتحانات میں نقل کو ختم کرنے کے عزم کو تقویت ملی ہے۔