اعلیٰ ثانوی تعلیمی بورڈ
کراچی کے ناظم امتحانات محمد عمران خان چشتی نے انٹرمیڈیٹ کے تمام گروپس
کیلئے ضمنی امتحانات برائے 2016ء کے امتحانی فارمز جمع کروانے کی تاریخوں
کااعلان کردیا ہے۔ تفصیلات بتاتے ہوئے محمد عمران خان چشتی نے کہا کہ
پروگرام کے مطابق سائنس پری میڈیکل، پری انجینئرنگ، سائنس جنرل ، کامرس
ریگولر،کامرس پرائیویٹ،آرٹس ریگولر،آرٹس پرائیویٹ اور ہوم اکنامکس گروپس
سمیت امپروومنٹ آف ڈویژن، بینیفٹ کیسز اورایڈیشنل سبجیکٹس کے ضمنی امتحانات
برائے 2016ء میں شرکت کے خواہشمند اور اہل ریگولر امیدوار اپنے امتحانی
فارم آج بروز جمعرات 6اکتوبر 2016ء سے بروز پیر 24 اکتوبر 2016ء تک اپنے
متعلقہ کالجوں میں جمع کرواسکتے ہیں جبکہ پرائیویٹ امیدوار اپنے امتحانی
فارم ضروری تصدیق کے بعد انہی تاریخوں میں اعلیٰ ثانوی تعلیمی بورڈ میں
واقع بینک برانچ میں جمع کرواسکتے ہیں۔کالجوں کو ہدایت کی گئی ہے کہ وہ
تمام ریگولر امیدواروں کے امتحانی فارمز اور فیسوں کے پے آرڈرز بروز منگل
25اکتوبر اور بروز بدھ 26اکتوبر 2016ء کو اعلیٰ ثانوی تعلیمی بورڈ کے
اکاؤنٹس سیکشن میں جمع کروادیں۔ناظم امتحانات کا کہناتھا کہ جو امیدوار
مقررہ تاریخ تک اپنے امتحانی فارم جمع نہیں کراسکیں وہ 25اکتوبر سے
28اکتوبر تک 200روپے لیٹ فیس کے ساتھ، 31 اکتوبر سے 3 نومبر تک 500 روپے
لیٹ فیس کے ساتھ جبکہ 4نومبر سے 8نومبر تک ایک ہزار روپے لیٹ فیس کے ساتھ
اپنے امتحانی فارمز جمع کرواسکتے ہیں۔ناظم امتحانات محمد عمران خان چشتی نے
مزید بتایا کہ مذکورہ بالا تمام گروپس کے سالانہ امتحانات برائے 2016ء کے
ریگولر امیدواروں کی مارکس شیٹس ان کے متعلقہ کالجوں کو جاری کردی گئی ہیں
جبکہ پرائیویٹ امیدواروں کی مارکس شیٹس ان کی جانب سے دیئے گئے پتوں پر
روانہ کردی گئی ہیں۔