اعلیٰ ثانوی تعلیمی بورڈ پندرہ دسمبر کے بعد انرولمنٹ فارم وصول نہیں کرے گا

پندرہ دسمبر کے بعد کوئی انرولمنٹ فارم وصول نہیں کیا جائے گا، یاد رہے اعلیٰ ثانوی تعلیمی بورڈ اس سے قبل بھی انرولمنٹ فارمز جمع کروانے کیلئے دو تاریخیں دے چکا ہے ،انرولمنٹ فارم جمع کروانے کیلئے پندرہ دسمبر تک توسیع بھی صرف طلباء کے مفاد اور سہولت کو مدنظر رکھتے ہوئے دی گئی تھی اور اب انٹربورڈ نے حتمی اعلان کیا ہے کہ مقررہ تاریخ کے بعد کوئی انرولمنٹ فارم قبول نہیں کیا جائے گا۔

ناظم امتحانات محمد عمران خان چشتی نے بتایا کہ چونکہ تعلیمی اداروں میں تمام داخلے مکمل ہوچکے ہیں اس لئے اب انرولمنٹ فارمز جمع کروانے میں تاخیر کا کوئی جواز نہیں ہے، تمام کالجوں اور ہائیر سیکنڈری اسکولوں کو بھی خط لکھ دیا گیا ہے کہ وہ اپنے انرولمنٹ فارمز مقررہ تاریخ تک لازمی طور پر جمع کروادیں۔

ناظم امتحانات محمد عمران خان چشتی نے انرولمنٹ فارمز جمع کروانے کا شیڈول بتاتے ہوئے کہا کہ تمام گروپس کے انٹرمیڈیٹ سال اول 2017ء کے امتحانات میں شرکت کے خواہشمند اور اہل ریگولر امیدواراپنے انرولمنٹ فارم 15 دسمبر 2016ء تک پانچ سو روپے لیٹ فیس کے ساتھ اپنے کالجوں میں جمع کروادیں جبکہ کالجز اور ہائر سیکنڈری اسکول تمام انرولمنٹ فارمز پے آرڈر کے ساتھ 19دسمبر اور 20دسمبر 2016ء کو متعلقہ سیکشن سے ضروری تصدیق کے بعد بورڈ آفس کے اکاؤنٹس سیکشن میں جمع کروادیں۔