سیکنڈری اسکول سرٹیفکیٹ سال 2017-18کے امتحانی اور انرولمنٹ فارم جمع کروانے کیلئے چھ حب سینٹر

میٹرک بورڈ کے چیئرمین پروفیسر ڈاکٹر سعید الدین نے بتایاہے کہ اس بات کا فیصلہ بورڈ سے الحاق اسکول، اساتذہ، والدین اور طلباء وطالبات کو سہولت فراہم کرنے کیلئے یہ فیصلہ کیا گیا ہے تاکہ لانڈھی ، کورنگی، گڈاپ، اورنگی، لیاری اور ملیر جیسے دور دراز علاقوں سے آنے والے کو بورڈ تک آنے کی تکلیف سے نجات دلائی جا سکے۔تفصیلات کے مطابق پیر18ستمبر سے جن اسکولوں کو حب سینٹر بنایا گیا ہے ان میں دہلی گورنمنٹ بوائز سیکنڈری اسکول کریم آباد، گورنمنٹ بوائز سیکنڈری اسکول بلاک 6گلشن اقبال، این جے وی گورنمنٹ بوائز ہائر سیکنڈری اسکول ایم اے جناح روڈ، سائٹ ماڈل گورنمنٹ بوائز ہائر سیکنڈری اسکول منگھو پیر روڈ، آصف گورنمنٹ بوائز سیکنڈری اسکول کالا بورڈ ملیر اور کمپری ہینسو گورنمنٹ بوائز ہائر سیکنڈری اسکول کورنگی نمبر ساڑھے تین میں فارمز جمع کروائے جا سکتے ہیں۔ یہ تمام فارم بذریعہ پے آرڈر بنام سیکرٹری بورڈ آف سیکنڈری ایجوکیشن جمع ہوں گے جبکہ ضمنی امتحانات میں شرکت کرنے والے امیدوار بھی مذکورہ بالا سہولت سے فائدہ اٹھا سکتے ہیں۔