انٹرمیڈیٹ بورڈ: تمام گروپس کے لئے امتحانی فارمز کی تاریخ

پروگرام کے مطابق سائنس پری میڈیکل، پری انجینئرنگ، سائنس جنرل، کامرس، آرٹس اور ہوم اکنامکس گروپس کے سالانہ امتحانات برائے 2018ء میں شرکت کے اہل گورنمنٹ کالجوں اور ہائر سیکنڈری اسکولوں کے ریگولر امیدوار اپنے امتحانی فارم بروز منگل 2جنوری 2018ء سے 30 جنوری 2018ء تک اپنے تعلیمی اداروں میں جمع کرواسکتے ہیں، کالجز اور ہائیر سیکنڈری اسکولز یہ فارمز 31جنوری اور یکم فروری 2018ء کو بورڈ آفس میں جمع کروانے کے پابند ہوں گے، یاد رہے کہ رواں سال محترم وزیراعلیٰ سندھ کی ہدایت کے مطابق تمام گورنمنٹ کالجز اور ہائر سیکنڈری اسکولوں کے طلباء کی امتحانی فیس معاف کردی گئی ہے، لہٰذا گورنمنٹ تعلیمی اداروں کے طلباء بغیر کسی فیس کے امتحانی فارمز اپنے کالجوں اور ہائیر سیکنڈری اسکولوں میں جمع کرواسکتے ہیں،تاریخ گزرنے کے بعد امتحانی فارم قبول نہیں کیے جائیں گے۔

اسی طرح سائنس پری میڈیکل، پری انجینئرنگ، سائنس جنرل، کامرس، آرٹس اور میڈیکل ٹیکنالوجی کے سالانہ امتحانات 2018ء میں شرکت کے اہل پرائیویٹ کالجوں اور ہائر سیکنڈری اسکولوں کے ریگولر امیدوار اپنے امتحانی فارم بروز منگل 2 جنوری سے بروز جمعرات 18جنوری تک اپنے تعلیمی اداروں میں جمع کرواسکتے ہیں، پرائیویٹ کالجز اور ہائر سیکنڈری اسکولز یہ امتحانی فارمز بمع فیسوں کے پے آرڈرز بروز پیر22جنوری 2018ء تک بورڈ آفس میں جمع کروانے کے پابند ہوں گے۔جو امیدوار مقررہ تاریخ تک اپنے امتحانی فارم جمع نہ کراسکیں وہ پانچ سو روپے لیٹ فیس کے ساتھ 22جنوری سے 30جنوری تک جبکہ ایک ہزار روپے لیٹ فیس کے ساتھ یکم فروری سے 9فروری تک امتحانی فارم اپنے کالجوں میں جمع کرواسکتے ہیں۔

کامرس اور آرٹس گروپس کے پرائیویٹ امیدوار اپنے امتحانی فارم سترہ یا زیادہ گریڈ کے افسران سے تصدیق کے بعد 2جنوری سے 19جنوری تک اعلیٰ ثانوی تعلیمی بورڈ میں واقع حبیب بینک بوتھ سمیت یو بی ایل کی مقررہ دس برانچوں میں جمع کرواسکتے ہیں، جو پرائیویٹ امیدوار مقررہ تاریخوں میں امتحانی فارمز جمع نہیں کرواسکیں وہ 22جنوری سے 31جنوری تک پانچ سو روپے لیٹ فیس کیساتھ جبکہ یکم فروری سے 12فروری تک ایک ہزار روپے لیٹ فیس کیساتھ اپنے فارمز جمع کرواسکتے ہیں۔

پرائیویٹ امیدوار اپنے امتحانی فارم بورڈ میں واقع حبیب بینک کے بوتھ کے علاوہ یو بی ایل کی دس برانچوں نارتھ کراچی برانچ ناگن چورنگی، نصیر آباد برانچ رحیم آباد نصیر آباد ایف بی ایریا شاہراہ پاکستان، کورنگی کے ایریا برانچ کے ایریا کورنگی نمبر پانچ، حسین ڈی سلوا برانچ سمیع ٹاور قادری مارکیٹ بلاک اے نارتھ ناظم آباد، اورنگی ٹاؤن برانچ نزد میٹرو سینما اورنگی ٹاؤن نمبر تین، ملیر ٹاؤن شپ برانچ ملیر ٹاؤن نیشنل ہائی وے، شہید ملت برانچ شہید ملت روڈ بالمقابل کراؤن پلازہ، حامد اسکوائر برانچ حامد اسکوائر بلاک 3 گلشن اقبال نزد ڈسکو بیکری، گارڈن برانچ نشتر روڈ بالمقابل زولوجیکل گارڈن اور بھٹائی کالونی برانچ پلاٹ نمبر 410/411بھٹائی کالونی کورنگی کراسنگ میں جمع کرواسکتے ہیں۔تاریخ گزرنے کے بعد امتحانی فارم قبول نہیں کیے جائیں گے۔