کورونا وائرس کے پھیلاؤ سے بچنے کے لئے اسٹیٹ بینک آف پاکستان نے بڑا فیصلہ کر لیا۔
تفصیلات کے مطابق سماجی فاصلے کو یقینی بنانے اور صارفین کو سہولت پہنچانے کے لیے تمام کمرشل بینکس کو گھروں سے چیک وصول کرنے کی اجازت دے دی گئی ہے۔
مرکزی بینک کے سرکلر کے مطابق بینک اور ایم ایف بی سروس مہیا کرسکتے ہیں جس کے تحت صارفین کی درخواست پر رجسٹرڈ ایڈریس سے چیک وصول کرنے کا انتظام کیا جائے گا اس طرح عملہ صارفین کے گھر سے چیک موصول کرسکے گا۔
سرکلر کے مطابق یہ بھی ممکن ہے کہ بینک براہ راست چیک ڈپازٹ کی سہولت مہیا کریں جس کے تحت وصول کنندہ ادائیگی یا رقم نکالنے والے بینک میں کراس چیک براہ راست بینک میں پیش کرسکتا ہے۔
واضح رہے اسٹیٹ بینک نے بینکوں پر زور دیا ہے کہ اپنے صارف کے اکاؤنٹ سے رقم ڈیبٹ کرنے سے پہلے ادائیگی کرنے والے یا رقم منتقل کرنے والے بینک کو لازمی طور پر تمام ضروری احتیاطی تدابیر اختیار کرنی چاہیے۔