برطانوی ماہرین کی جانب سے ایک تحقیق کی گئی جس کے نتائج نے سب کو ہی حیران ہونے پر مجبور کردیا۔
تفصیلات کے مطابق برطانیہ کے ادارہ برائے قومی شماریات نے انگلینڈ میں کورونا کے حوالے سے تحقیق کی جس کے دوران مریضوں کی تفصیلات جمع کی گئیں۔
مذکورہ ادارے نے منگل کے روز کورونا کے مریضوں کے حوالے سے کی جانے والی تحقیق کے اعداد و شمار اور نتائج جاری کیے جس میں انکشاف ہوا کہ انگلینڈ میں کورونا سے متاثر ہونے والے 78 فیصد افراد ایسے تھے جن میں اس وائرس کی کوئی علامت ظاہر نہیں ہوئی۔
ماہرین نے تحقیق سے حاصل ہونے والے نتائج کے بعد پریشانی ظاہر کی ہے کیونکہ ایسی صورتحال بڑے خطرے کا باعث ہے۔ عوام کو ہدایت کی گئی ہے کہ وہ پہلے سے زیادہ سختی سے احتیاطی تدابیر پر عمل کریں۔
ماہرین کے مطابق ہر دوسرے شخص کا کورونا ٹیسٹ مثبت آیا، جبکہ حیران کر دینے والی بات یہ ہے کہ اُس میں کوئی علامت بھی موجود نہیں تھی۔
ادارہ شماریات کے مطابق ڈاکٹرز کی ٹیم نے اپنی مرضی سے لوگوں کا انتخاب کیا اور پھر اُن کے ٹیسٹ بھی کیے۔
واضح رہے یہ لوگ معمول کے مطابق زندگی گزار رہے تھے جبکہ یہ لوگ کسی قسم کی کوئی علامت نہ ہونے کی وجہ سے احتیاطی تدابیر پر عمل پیرا بھی نہیں ہورہے تھے۔