پاکستانی نوجوان قابلیت اور صلاحیت میں دنیا کے کسی بھی خطے کے نوجوانوں سے کم نہیں۔ اس بات کا حال ہی میں نیا ثبوت پیش کیا ہے میر پور یونیورسٹی آف سائنس اینڈ ٹیکنالوجی کے طالب علموں نے ایک ایسی گاڑی تیار کرکے جو بغیر ڈرائیور کے چلتی ہے۔
صرف 13 لاکھ میں گاڑی بنا لی
سماء ٹی وی سے بات کرتے ہوئے پراجیکٹ ہیڈ فیصل ریاض نے بتایا کہ یہ پراجیکٹ انھیں حکومت پاکستان کی جانب سے دیا گیا تھا اور اور اس پر کام کرنے کے لیے 1 کروڑ 45 لاکھ کی رقم بھی دی گئی تھی لیکن فیصل ریاض کی ٹیم نے صرف 13 لاکھ میں پراجیکٹ مکمل کرلیا۔
سی پیک کے منصوبے میں بھی استعمال کی جاسکتی ہے
فیصل نے بتایا کہ یہ گاڑی مزید کم لاگت میں تیار ہوسکتی ہے اور اس سے زراعت کے شعبے میں بہت فائدہ ہوسکتا ہے کیونکہ یہ بنیادی طور پر سامان کو ایک جگہ سے دوسری جگہ پہنچانے کا کام انجام دینے کے لئے بنائی گئی ہے۔ اس کے علاوہ ائیر پورٹس اور سی پیک کے منصوبے میں بھی اس گاڑی کا استعمال فائدہ مند ثابت ہوگا۔