بغداد: پاکستان پیپلزپارٹی کے چیئرمین اور وزیر خارجہ بلاول بھٹو زرداری کی شیخ عبدالقادر جیلانی کے مزار پر آمد، مزار کی نئی جالی کو خصوصی طور پر کھولا گیا۔
چیئرمین بلاول بھٹو زرداری کا شیخ عبدالقادر جیلانی کی درگاہ کے سجادہ نشین شیخ خالد عبدالقادر المنصور الجیلانی نے استقبال کیا، بلاول بھٹو نے شیخ عبدالقادر جیلانی کے مزار پر فاتحہ خوانی کی اور چادر بھی چڑھائی۔
وزیر خارجہ کو شیخ عبدالقادر جیلانی کی درگاہ کے سجادہ نشین شیخ خالد عبدالقادر المنصور الجیلانی مزار شریف کے مختلف حصوں کا دورہ کرایا۔
یاد رہے کہ وزیرخارجہ بلاول بھٹو دورہ عراق پر ہیں اورگزشتہ روز انہوں نے عراقی ہم منصب فواد حسین سے ملاقات کی تھی۔ملاقات میں دنوں ممالک کے وزرائے خارجہ نے وفود کی سربراہی کی۔
بلاول بھٹو زرداری اور فواد حسین نے مختلف شعبوں میں دوطرفہ تعلقات کو مزید مضبوط بنانے پر اتفاق کیا جبکہ قریبی اور خوشگوار تعلقات پر بھی اتفاق کیا گیا۔
اس کے علاوہ وزیر خارجہ بلاول بھٹو نے پاک عراق بزنس فورم سے خطاب کرتے ہوئے کہا کہ پاکستان میں سرمایہ کاری کے وسیع مواقع موجود ہیں، پاکستان اور عراق کے درمیان تجارتی اور اقتصادی تعاون بڑھانے کی ضرورت ہے۔
انہوں نے کہا کہ دونوں ملکوں کے درمیان زراعت اور آبی وسائل کے شعبوں میں تعاون کے مواقع موجود ہیں، دفاعی پیداوار اور مواصلاتی رابطوں کو فروغ دینا بھی وقت کی اہم ضرورت ہے۔