کوک فقیر کی

کُوک فقیرا کُوک
تے کوئی بھیت اندر دا کڈھ
مندڑا بول نا بول،تے جِیبھ اپنڑی نُوں وڈھ
کُوک فقیرا کُوک
تیری کُوک دی اُچڑی شان
ایس کُوک دی چرکھی گھُمدے، ست زِمیاں تے اسمان
کُوک فقیرا کُوک
تے ایس کُوک اِچ ہو کے گُم
آ مار مُکائیےمیں نُوں فیر جپیئے تُم ای تُم
کُوک فقیرا کُوک
وے تیری کُوک دے پکے رنگ
رنگ ہِک ھکلاّ چاڑھ دے،مینُوں کعبہ لگے جھنگ
کُوک فقیرا کُوک
کالا چور بُکل دا مار
اکھیں سُرمہ صِدق حُسینی، تے ہتھ حیدر دی تلوار
کُوک فقیرا کُوک
تیری کُوک مِلائے یار
گھڑا پکا دے یقین دا،میں لگ ونجاں اُس پار
کُوک فقیرا کُوک
تیری کُوک جیہا کوئی ناہیں
جوشہرعشق دے جاپہونچن، مینوں پا دے اوہناں راہیں
کُوک فقیرا کُوک
تیری کُوک دے ساوے باگ
تیرے ہتھ پھُلاں دے ٹوکرے،تیریاں سوچاں صاف گُلاب
کُوک فقیرا کُوک
تیرے سب توں وکھرے گِیت
ایہہ بانگاں پچھلے پہر دیئاں، پیئیاں گُونجن من مسِیت
کُوک فقیرا کُوک
جے آج ہووے یار وصال
پیرِیں ساویاں جھانجھراں بنھ کے،میں پاواں انت دھمال