کڑھائی کے کپڑے شادی بیاہ میں خواتین بنا تو لیتی ہیں مگر ان کو سنبھال کر رکھنا سب سے زیادہ مشکل اور اہم کام ہے کیونکہ ان کپڑوں میں گوٹے، تلے یا دبکے کا کام ہوتا ہے جوکہ اگر سنبھال کر نہ رکھا جائے تو خراب ہوجاتے ہیں کالے پڑنے لگتے ہیں۔ ان کپڑوں کو صرف سنبھالنا یا محفوظ رکھنا ہی مشکل نہیں بلکہ ان کو دھونا بھی ایک اہم کام ہے۔
کڑھائی کے کپڑوں کو دھونے کا طریقہ:
کڑھائی کے کپڑوں کو آپ ایک سادے پانی سے بھرے ٹپ میں ڈال دیں اور پھر اس میں صرف واشنگ پاؤڈر ڈال کر ان کو بھگو دیں۔ پھر پندرہ سے بیس منٹ بعد آپ ان کو ہاتھوں کی مدد سے رگڑیں اور دھو لیں۔
کڑھائی کے کپڑوں کو خشک کرنے کا طریقہ:
ان کو خشک کرنے کے لئے آپ ان کو ایک تولیے پر ڈال دیں تاکہ ان کا سارا پانی تولیے میں جذب ہوجائے اور یہ جلد خشک ہوجائیں۔ کیونکہ زیادہ دیر تک کڑھائی پر پانی لگنے سے کڑھائی جلد کالی پڑتی ہے۔
کڑھائی کے کپڑوں کو کس طرح رکھا جائے؟
کڑھائی کے کپڑوں کو رکھنے کا آسان طریقہ یہ ہے کہ ان کو ہینگر میں ٹانگ کر رکھیں اور ان پر سادی پلاسٹک کی کپڑوں والی تھیلی چڑھادیں تاکہ یہ نمی کی وجہ سے بھی خراب نہ ہوں۔
پرفیوم سے کالے ہو جائیں تو کیا کریں؟
کڑھائی پر اگر پرفیوم کا استعمال کیا جائے تو وہ کالی پڑ جاتی ہے اس لئے بہتر یہ ہے کہ آپ ایسے کپڑے پہن کر پرفیوم اپنے ہاتھوں، گردن یا کلائی پر لگائیں۔ اور کپڑے رکھتے وقت ان میں چند لونگ ڈال کر بند کرکے رکھ دیں۔
ان تمام طریقوں سے یہ کپڑے خراب نہیں ہوں گے اور نہ کالے پڑیں گے۔