بچپن میں ایک اردو کی کتاب میں نظم ہوا کرتی تھی ہائے رے سردی ہائے رے سردی سارے بدن میں برف سی بھر دی۔۔۔ لیکن اب اس شدت کی گرمی ہے کہ سب کے منہ سے ہائے رے گرمی ہائے رے گرمی نکلتا ہے۔ اس بلا کی گرمی میں لوگوں کا بس نہیں چلتا کہ کیا کریں، فریج ساتھ لے کر چلیں یا ائیر کنڈیشنڈ کمروں سے باہر نہ نکلیں۔ لیکن اس کے ساتھ لوڈ شیڈنگ نے بھی عوام کو خون کے آنسو رلا دیا ہے۔ ایسے میں بے بس عوام کچھ ٹوٹکوں اور گھریلو نسخوں سے ہی اپنی زندگی کو کچھ آسان بنا سکتی ہے۔ اسی گرمی کی شدت کو قابلِ برداشت بنانے کے لئے ہم آپ کے لئے لائے ہیں ایک ایسی ڈرنک ایک ایسا فرحت بخش مشروب جو کہ آپ کو تروتازہ کر دے گا۔ اور پسینے اور گرمی سے کھوئی ہوئی توانائی بھی بحال کر دے گا۔

کھیرا 1 عدد

کھجور 5 سے 6 عدد

ادرک 1 انچ کا ٹکڑا

دھنیا کچھ پتیاں

لیموں 1 عدد

ایک بلینڈر میں کھیرا، گٹھلی نکالی ہو ئی کھجوریں، ادرک، دھنیا، اور لیموں کا رس ڈال کر اور حسبِ ضرورت پانی ڈال کراچھی طرح بلینڈ کر لیں۔ جب بلینڈ ہو جائے تو اس میں ڈھیر ساری برف بھی ڈال کر بلینڈ کریں۔ لیجیے آپ کی مزیدار سمر کولر موکٹیل تیار ہے۔۔ اس میں کھیرا آپ کو ہائیڈریٹ کرے گا، جسم کو ٹھنڈا رکھے گا، ادرک پیٹ کی تکالیف کو دور کرے گا بد ہضمی سے بچائے گا، دھنیا فوڈ پوائزننگ سے بچاتا ہے جبکہ لیموں سے ذائقے کے ساتھ ساتھ میٹا بولزم بھی اچھا کام کرے گا ،کھجور تو منرلز اور فائبر کا خزانہ ہے اس سے آپ کی کھوئی ہوئی توانائی بحال فوری بحال ہوگی۔