انسان کی صحت کا اور اس کی غذا کا آپس میں چولی دامن کا ساتھ ہوتا ہے اکثر لوگوں کا یہ خیال ہوتا ہے کہ متوازن کھانا ہی صحت کے لیۓ ضروری ہوتا ہے مگر اس بات کا خیال بہت کم لوگ رکھتے ہیں کہ صرف متوازن غذا ہی صحت کے لیۓ ضروری نہیں ہوتی ہے بلکہ اس کے ساتھ ساتھ کھانا کس برتن میں بنایا جا رہا ہے وہ بھی صحت پر بری طرح اثر انداز ہوتا ہے
کھانا بنانے کے برتنوں کے اثرات
عام طور پر کھانا بنانے کے لیۓ مختلف دھاتوں کا استعمال کیا جاتا ہے مگر اس حقیقت سے کم ہی لوگ واقف ہیں کہ ہر دھات میں کھانا بنانے کے صحت پر مختلف اثرات ہوتے ہیں جس کے بارے میں ہم آپ کو آج بتائيں گے
چاندی
ماضی میں عام طور پر گھروں میں کھانا چاندی کے برتنوں میں پکایا جاتا تھا جو کہ اگرچہ آج کل کے دور میں تو ایک خواب ہو گیا ہے مگر ماضی میں زیادہ تر گھرانوں میں کم از کم پکانے کا برتن ضرور چاندی کا ہوتا تھا
چاندی جو کہ تاثیر کے حساب سے ٹھنڈی ہوتی ہے اس وجہ سے ماہرین کا یہ ماننا ہے کہ اس میں کھانا بنانے سے معدے کو ٹھنڈک ملتی ہے اس کے علاوہ چاندی اینٹی بیکٹیریل خصوصیات کی حامل دھات ہے جس سے جراثيم کا بھی خاتمہ ہوتا ہے
تانبا
تانبے کی سب سے بڑی خصوصیت یہ ہوتی ہے کہ وہ حرارت کا بہت اچھا موصل ہوتا ہے اس وجہ سے اس میں کھانا بہت جلدی پک جاتا ہے اس کے علاوہ تانبے میں جراثیم کش دھات ہے جس میں پکا کھانا زہریلے مادوں کو جسم سے خارج کرنے میں بہت مدد دیتا ہے
تانبے میں پکے کھانا کھانے سے معدے پر اچھے اثرات مرتب ہوتے ہیں اور ہاضمہ بہتر ہوتا ہے ۔ تاہم ماہرین کا یہ ماننا ہے کہ کھٹی چیزوں کو تانبے کے برتن میں نہیں پکانا چاہیے کیوں کہ اس سے اس میں تانبے کا ذائقہ مکس ہو جاتا ہے
سٹین لیس اسٹیل
اسٹیل آج کل کے دور میں سب سے عام استعمال ہونے والی دھات ہے جو کہ سب سے زيادہ استعمال کیا جاتا تے اور اس کا سب سے بڑا سبب ایک جانب تو اس کا بے ضرر ہونا ہوتا ہے دوسرا یہ قیمت میں بھی کافی کم ہوتا ہے اس میں کھانا پکانے سے نہ تو اس کے ذائقے پر کوئی فرق پڑتا ہے اور نہ ہی کوئی مثبت یا منفی اثر ہوتا ہے
تاہم اسٹیل کے برتن اگر پرانے ہو جائيں تو اس کے اجزا کھانے میں شامل کر نقصان کا سبب بن سکتے ہیں
المونیم
المونیم آج کل کے زمانے میں عام طور پر استعمال ہونے والی دھات ہے جس میں کھانا بنانے کا ٹرینڈ تیزی سے بڑھ رہا ہے کم وزن اور جلد گرم ہونے کے سبب المونیم میں کھانا بنانا بہت آسان ہوتا ہے
مگر اس کے لیۓ ضروری ہے کہ المونیم بہت اچھی کوالٹی کا استعمال کرنا چاہیۓ جو کہ مکمل طور پر پالش شدہ ہو کیوں کہ اگر اس کی پالش اترنے لگے تو المونیم کھانے میں شامل ہونے لگتا ہے اور نہ صرف کھانے کی لذت کو بگاڑنے کا باعث بنتا ہے بلکہ اس کے زہریلے مادے کھانے کو بھی زہر آلود کر دیتے ہیں