نمک کھانے میں ہی نہیں بلکہ اور بھی بہت سے کاموں کے لیے استعمال کیا جاتا ہے۔ کھانے میں نمک شامل نہ کیا جائے تو کھانے کا مزہ ادھورا رہ جاتا ہے۔ اس کی قیمت مہنگی تو نہیں ہوتی لیکن اس کے فوائد ضرور کارآمد ثابت ہوتے ہیں۔آج ہم آپ کو نمک کے کچھ فوائد بتاتے ہیں جو آپ کے بہت کام آئیں گے۔
تیل کے چھینٹوں کو روکے
کھانا بناتے وقت فرائی ہونے والی اشیاﺀ سے تیل کے چھینٹے اڑتے ہیں جو آپ کے لیے خطرناک ثابت ہوسکتے ہیں۔ اس کے لیے آپ تیل میں تھوڑا سا نمک شامل کردیں تو تیل اڑے گا نہیں اور آپ کسی بھی چیز کو آرام سے فرائی کرسکتی ہیں۔
چیونٹیوں سے نجات
اکثر گھر میں چیونٹیاں ہوجاتی ہیں اور ہم مہنگی ادویات کا استعمال کرتے ہیں لیکن بعض اوقات اس کا کوئی فائدہ نہیں ہوتا ہے- چیونٹیوں سے نجات کے لیے جہاں چیونٹی ہوں وہاں نمک چھڑک دیں یا اس کو پانی میں ملاکر اس جگہ پر پونچھا لگائیں۔
چولہے سے بھڑکنے والی آگ کو بجھائیں
اکثر خواتین کو کھانا بناتے وقت اس پریشانی کا سامنا رہتا ہے کہ چولہے سے اچانک آگ بھڑک اٹھتی ہے۔ اگر بروقت اس میں نمک چھڑک دیا جائے تو آگ کے شعلوں پر قابو پایا جاسکتا ہے۔