آپ کے اسمارٹ فون کی بیٹری کی قاتل 8 چیزیں

اسمارٹ فون کے صارفین کو اس وقت سب سے بڑا مسئلہ بیٹری کے جلد ختم ہونے کا درپیش ہے- یہاں تک کہ ہم اکثر دیکھتے ہیں کہ ہمارے فون کی بیٹری بغیر استعمال کیے بھی کم ہورہی ہے اور ضرورت پڑنے پر بیٹری کم ہونے کی وجہ سے ہم مشکل کا شکار بن جاتے ہیں- اسی مسئلے کو مدِنظر رکھتے ہوئے ہم یہاں آپ کو چند ایسی ٹپس بتارہے ہیں جو آپ کے اسمارٹ فون کی بیٹری کو طویل وقت تک محفوظ بنا سکتی ہیں-

غیر ضروری ایپس
اسمارٹ فون میں بہت زیادہ یا غیر ضروری ایپس انسٹال کرنا بیٹری کو کارکردگی کو متاثر کرسکتا ہے- ان ایپس کی جانب سے ارسال کردہ الرٹ نوٹیفیکیشن بیٹری کی توانائی کو تیزی سے خرچ کرتے ہیں جس سے بیٹری جلد ختم ہوجاتی ہے-

بلیو ٹوتھ
اکثر صارفین اپنے اسمارٹ فون کے بلیو ٹوتھ آپشن کو ہمیشہ فعال رکھتے ہیں کیونکہ ان کا بلیو ٹوتھ دیگر ڈیوائسز سے منسلک رہتا ہے- آپ کو چاہیے کہ جب کوئی ڈیوائس استعمال نہ کر رہے ہوں تو بلیو ٹوتھ کے آپشن کو بھی بند کردیں- اس سے آپ کے اسمارٹ فون کی بیٹری تیزی سے خرچ نہیں ہوگی اور طویل وقت تک آپ کا ساتھ دینے کے قابل رہے گی-

بہت زیادہ فون کالز
اگر آپ کو بہت زیادہ فون کالز آتی ہیں یا آپ طویل وقت تک فون پر بات کرتے رہتے ہیں تو یہ بھی ایک اہم وجہ ہے آپ کے اسمارٹ فون کی بیٹری جلد ختم ہونے کی- اگر آپ اپنے اسمارٹ فون کی بیٹری کو طاقتور بنانا چاہتے ہیں تو غیر ضروری باتوں یا فون کالز سے اجتناب کیجیے- اس میں آپ کے وقت اور بیٹری دونوں کی بچت ہے-

بیٹری لائف 30 فیصد بڑھائیں
اگر آپ کے فون کی بیٹری جلد ختم ہوجاتی ہے تو اینڈرائیڈ مارش میلو کے صارفین بیٹری لائف کو تیس فیصد تک بڑھا سکتے ہیں، آپ کو اس کے لیے سیٹنگز میں جاکر بیٹری پر کلک کرنا ہوگا اور سیور موڈ آن کرنا ہوگا۔ اس کے بعد جب آپ فون استعمال نہیں کررہے ہوں گے تو ڈیوائس گہری نیند کی کیفیت میں چلی جائے گی اور بیک گراﺅنڈ ایپس کی سرگرمیاں کم ہوجائیں گی۔

ویڈیو اور تصاویر
دورانِ سفر یا خاص مواقعوں پر ہم بہت زیادہ تصاویر اور ویڈیو بنانے کے عادی ہوتے ہیں اور اس دوران ہم ایسی ویڈیوز اور تصاویر بھی کھینچ لیتے ہیں جن کی حقیقت میں کوئی ضرورت نہیں ہوتی- صرف انہی لمحات کو اپنے کیمرے میں قید کریں جو واقعی دلچسپ ہوں- اس کے علاوہ تصاویر یا ویڈیو بناتے وقت آپ اپنا موبائل فون ائیر پلین موڈ پر بھی رکھ سکتے ہیں- اس طرح آپ کی بیٹری کی کافی بچت ہوسکتی ہے کیونکہ کیمرے کو بھی بہت زیادہ توانائی کی ضرورت ہوتی ہے-

لوکیشن
جہاں ایک جانب اسمارٹ فون میں موجود لوکیشن کا فیچر صارفین کے لیے بہت زیادہ کارآمد ثابت ہوا ہے وہیں دوسری طرف اس نے اسمارٹ فون کی بیٹریوں پر گہرے منفی اثرات مرتب کیے ہیں کیونکہ یہ فیچر بہت زیادہ بیٹری استعمال کرتا ہے- اس لیے ایسی ایپس جو لوکیشن کے فیچرز پر مبنی ہوں ان کا استعمال احتیاط سے کیجیے-

رنگ برنگے وال پیپرز
موبائل فون پر لگائے جانے والے بہت زیادہ رنگین اور روشن وال پیپرز بھی اسمارٹ فون کی بیٹری کو تیزی سے خرچ کرتے ہیں- اس لیے آپ کو چاہیے کہ موبائل فون کی اسکرین کو کم روشن رکھیں اور ساتھ ہی ہلکے رنگ کے حامل یا بلیک اینڈ وائٹ وال پیپرز لگائیں-