آج کل ہر گلی ہر محلے میں آپ کو قربانی کے جانوروں اور ان کے ساتھ مصروف
بچوں اور بڑوں کا شور سنائی دے گا جس کی وجہ یقیناً عیدالاضحیٰ کی آمد ہے-
کوئی مویشی منڈی جانور خریدنے جارہا ہے تو کوئی وہاں سے مسکراتے چہرے کے
ساتھ جانور خرید کر لا رہا ہے- ہر طرف اسی سے ملتی جلتی صورتحال دکھائی
دیتی ہے-
|
|
کراچی کے شہریوں کے لیے ایک بڑی خوشخبری یہ ہے کہ رواں سال کراچی کے علاقے
سپر ہائی وے پر ایک نہیں بلکہ دو مویشی منڈیاں قائم کی گئی ہیں- آپ سپر
ہائی وے پر ہر سال قائم کی جانے والی مویشی منڈی سے تو واقف ہی ہوں گے جسے
ایشیا کی سب سے بڑی مویشی منڈی ہونے کا اعزاز بھی حاصل ہے-
لیکن اب پرانی مویشی منڈی سے کچھ فاصلے پر ہی ایک نئی مویشی منڈی بھی قائم
کی گئی ہے جو تیزی سے مقبولیت حاصل کر رہی ہے- جس کی وجہ اس نئی مویشی منڈی
میں لائے جانے والے خوبصورت جانور٬ ان کی مناسب قیمت اور یہاں کے منفرد
انتظامات ہیں-
|
|
نئی قائم کی جانے والی اس مویشی منڈی کو ایورسٹ مویشی منڈی کا نام دیا گیا
ہے اور یہ 950 ایکڑ کے وسیع رقبے پر پھیلی ہوئی ہے-
ایورسٹ مویشی منڈی کراچی کے سپر ہائی وے پر قائم کی جانے والی پرانی اور
روایتی مویشی منڈی سے تقریباً 13 کلومیٹر کے فاصلے پر وادی حسین قبرستان کے
قریب قائم کی گئی ہے- اس نئی مویشی منڈی میں ساڑھے چار لاکھ جانور رکھنے کے
انتظامات موجود ہیں-
|
|
یہ مویشی منڈی ایورسٹ انٹرنیشنل کمپنی اور عسکری ہاؤسنگ سوسائٹی کے باہمی
تعاون سے قائم کی گئی ہے اور اس میں بیوپاریوں اور خریداروں دونوں کے لیے
ہی ہر قسم کی سہولیات کی دستیابی کو مدنظر رکھا گیا ہے-
یہاں پانی٬ جنریٹر٬ چارجڈ پارکنگ اور اعلیٰ سیکورٹی کے انتظامات سمیت ہر
بنیادی سہولت مہیا کرنے کی کوشش کی گئی ہے- اس مویشی منڈی کا صاف ستھرا
ماحول دیکھ کر قربانی کے جانوروں کو دیکھنے کا شوق رکھنے والی فیملیز بھی
بڑی تعداد میں یہاں کا رخ کر رہی ہیں-
|
|
ایورسٹ مویشی منڈی میں آنے والے خریداروں اور فیملیز کے لیے ایک چھوٹا سا
پارک بھی قائم کیا گیا ہے-اس کے علاوہ اگر کوئی خریدار یا فیملی وغیرہ اپنی
گاڑی میں مویشی منڈی کی سیر کرنا چاہتا ہے تو اس کی بھی اجازت ہے- تاہم یہ
سہولت حاصل کرنے کے لیے مویشی منڈی کی انتظامیہ کو 300 روپے کی فیس ادا
کرنا ہوگی-
بڑے پیمانے پر قائم ہونے والی ایک اور مویشی منڈی کے قیام نے خریداروں کے
لیے جانور کے انتخاب میں آسانی پیدا کر دی ہے جس کی ایک وجہ اس نئی منڈی
میں جانوروں کی قیمتوں کا کم ہونا بھی ہے- اس نئی منڈی میں موجود جانوروں
کی قیمتوں میں سہراب گوٹھ کی پرانی مویشی منڈی میں موجود جانوروں کی قیمتوں
کے مقابلے میں واضح فرق پایا جاتا ہے-
|
|
ایورسٹ مویشی منڈی میں بیوپاریوں کو جانوروں کے لیے ایک وقت کا پانی مفت
فراہم کیا جارہا ہے جبکہ منڈی کی انتظامیہ بیوپاریوں سے بڑے جانور کے 1
ہزار روپے جبکہ چھوٹے جانور یعنی بکرے وغیرہ کے 600 روپے وصولتی ہے- یہ رقم
بھی جانور کے فروخت ہونے کے بعد وصولی جاتی ہے یعنی بیوپاری کو ہر جانور کے
لیے پیشگی رقم ادا نہیں کرنی-
اس کے علاوہ بیوپاری کو جانور کھڑے کرنے کے لیے کسی جگہ کے کرائے کی مد میں
بھی کوئی رقم ادا نہیں کرنی پڑے گی-
|
|
سب سے دلچسپ بات یہ ہے کہ ایورسٹ مویشی منڈی صرف
عیدالاضحٰی کے موقع کے لیے
منعقد نہیں کی گئی بلکہ یہ منڈی سال کے بارہ مہینے قائم رہے گی جبکہ
انتظامیہ کی جانب سے امکان ظاہر کیا جارہا ہے کہ جلد ہی کراچی کے علاقے
ملیر میں قائم کی جانے والی مویشی منڈی کو بھی اس نئی منڈی میں ضم کر دیا
جائے گا- |
|
|