پاکستان ٹیسٹ میچ کی میزبانی کا خواہشمند، سری لنکا کے سکیورٹی وفد کو دعوت

لاہور(این این آئی)پاکستان کرکٹ بورڈ(پی سی بی) نے رواں سال ملک میں ٹیسٹ میچ کی میزبانی کے لیے سری لنکن کرکٹ بورڈ کو اپنا سیکیورٹی وفد پاکستان بھیجنے کی دعوت دی ہے۔ملک میں انٹرنیشنل کرکٹ کی بحالی کے لیے پرعزم پاکستان کرکٹ بورڈ رواں سال ٹیسٹ میچ کے ملک میں انعقاد کا خواہشمند ہے اور اسی سلسلے میں پی سی بی نے سری لنکن کرکٹ بورڈ کو اپنا سیکیورٹی وفد پاکستان بھیجنے کی دعوت دی ہے۔پی سی بی ذرائع کے مطابق پی سی بی کی خواہش ہے کہ سری لنکن ٹیم رواں سال شیڈول سیریز کا ایک ٹیسٹ میچ پاکستان

آ کر کھیلے اور اسی لیے سری لنکن بورڈ اپنا سیکیورٹی وفد پاکستان بھیج کر صورتحال کا جائزہ لے سکتا ہے۔ذرائع نے دعویٰ کیا کہ سری لنکن بورڈ ایک ٹیسٹ میچ پاکستان میں کھیلنے پر تیار ہے تاہم اس بات کا حتمی فیصلہ سری لنکن سیکیورٹی وفد کی رپورٹ کی روشنی میں کیا جائے گا۔پاکستان اور سری لنکا کے درمیان ستمبر اور اکتوبر میں دو ٹیسٹ میچز کی سیریز متحدہ عرب امارات میں شیڈول ہے۔واضح رہے کہ مارچ 2009 میں سری لنکن ٹیم لاہور میں دہشت گرد حملے کے بعد سے پاکستان پر انٹرنیشنل کرکٹ کے دروازے بند ہو گئے تھے اور اس کے بعد پاکستانی ٹیم نے ملک میں اپنا کوئی ٹیسٹ میچ نہیں کھیلا اور تمام ہوم سیریز کی میزبانی نیوٹرل مقام پر کی۔


 

WATCH LIVE NEWS

Samaa News TV PTV News Live Express News Live 92 NEWS HD LIVE Pakistan TV Channels

Meta Urdu News: This news section is a part of the largest Urdu News aggregator that provides access to over 15 leading sources of Urdu News and search facility of archived news since 2008.