نوجوانوں کیلئے روزگار کے مواقع پیدا کرنا حکومت کی اولین ترجیح ہے، وزیراعظم

وزیراعظم عمران خان نے کہا ہے کہ  نوجوانوں کیلئے روزگار کے مواقع پیدا کرنا حکومت کی اولین ترجیح  ہے۔

پیر کے روز اسلام آباد میں حکومت کی معاشی ٹیم کے اجلاس کی صدارت کرتے ہوئے وزیر اعظم عمران خان نے  کہا کہ حکومت عام آدمی کو ریلیف دینے پر بھرپور توجہ دے رہی ہے۔

وزیراعظم نے وزارتوں اور محکموں کے درمیان رابطے بہتر بنانے پر خصوصی توجہ دینے کی ہدایت کی اور اس حوالے سے مختلف انداز فکر اختیار کرنے کیلئے کہا۔

ایف بی آر کے چیئرمین نے وزیراعظم کو برآمدکنندگان کو ریفنڈز کی ادائیگی کیلئے کئے گئے اقدامات سے متعلق تفصیلی بریفنگ دی۔

عمران خان نے کہا کہ حکومت کے اقدامات کی بدولت ملک معاشی طور پر مستحکم ہوا ہے اور تاجروں کا اعتماد بحال ہوا ہے۔

پٹرولیم کے بارے میں معاون خصوصی ندیم بابر نے اجلاس کو تاپی گیس پائپ لائن منصوبے پر پیشرفت سے آگاہ کیا۔

اجلاس کو بتایاگیا کہ برآمدات میں اکتوبر کے مہینے میں چھ فیصد اور گزشتہ ماہ نو اعشاریہ چھ فیصد اضافہ ہوا جو گزشتہ سال کے اسی عرصے کی نسبت زیادہ ہے۔ وزیراعظم نے اس مثبت رجحان پر اطمینان ظاہر کیا۔

وزیراعظم کو بتایاگیا کہ اعلیٰ عدلیہ میں ایف بی آر سے متعلق ایک ہزار نواسی میں سے پانچ سو اکاون کیسز کا فیصلہ کیا گیا ہے جبکہ دو سو پچاسی کیس زیر سماعت ہیں۔

وزیراعظم نے اٹارنی جنرل کو ہدایت کی کہ عدالتوں میں زیر سماعت کیسز کو فوری طور پر نمٹانے کیلئے کوششیں تیز کی جائیں ۔

واضح رہے کہ اس سے قبل  وزیرِاعظم عمران خان سے حال ہی میں ترقی پانے والے وفاقی سیکرٹریز کی ملاقات ہوئی جس میں وزیرِاعظم عمران خان نے ترقی پانے والے افسران کو مبارکباد دی جبکہ سیکرٹریز نے ملک کی تعمیر و ترقی کے لئے اپنا بھرپور کردارادا کرنے کی یقینی دہانی کرائی  ۔

اس موقع پر وزیراعظم نے کہا کہ افسران کی ترقی انکی کارکردگی اور خالصتاً میرٹ کو مدنظر رکھ کر کی گئی ہے، امید ہے افسران اپنی نئی ذمہ داریاں  نہایت فرض شناسی اور ملک و قوم کی خدمت کے بھرپورجذبے کے تحت ادا کریں گے۔


 

WATCH LIVE NEWS

Samaa News TV PTV News Live Express News Live 92 NEWS HD LIVE Pakistan TV Channels

Meta Urdu News: This news section is a part of the largest Urdu News aggregator that provides access to over 15 leading sources of Urdu News and search facility of archived news since 2008.