تعلیم سے محبت صرف طالبِ علم ہی نہیں بلکہ اگر ان کے والدین بھی کریں تو ہی بچے آگے بڑھ سکتے ہیں اور کامیابی کی طرف گامزن ہوتے ہیں بالکل ایسا ہی کراچی سے تعلق رکھنے والا نہم جماعت کا بچہ عشارب ہے جس کی ٹانگ ٹوٹ گئی، مگر پرچے دینے امتحانی مرکز پہنچ گیا۔ جس کو دیکھ کر نہ صرف اساتذہ حیران رہ گئے، ساتھ ہی امتحانی مرکز کے گارڈز اور دیگر عملہ بھی داد دینے پر مجبور ہوگیا۔
بچے کا تعلق کراچی کے علاقے ملیر سے ہے اور آج اس کا پرچہ ہے، جس پر اس کے والد کا کہنا ہے کہ :
''
میں عشارب کو اس لئے پیپر دلوانے لایا کیونکہ پورے سال کی محنت ہے، اس نے دل لگا کر پڑھائی کی ہے، 15 دن پہلے اس کی ٹانگ ٹوٹ گئی تھی، تو میں پریشان تھا کہ کیسے بچے کو امتحان دلواؤں گا، پھر میں نے اپنی اس مشکل میں ایدھی کی ایمبولینس سروس کال کی اور اپنی کہانی بتائی جس پر ایدھی کی جانب سے پرچے کے وقت سے آدھے گھنٹے قبل ایمبولینس میرے گھر بھیج دی گئی اور ہم مل کر بچے کو امتحانی مرکز لے آئے۔
''
مرکز پر موجود اساتذہ کہتے ہیں کہ اگر سب بچے اسی طرح پڑھائی سے محبت کریں اور دل جوئی سے پڑھیں تو ان کا مستقبل بھی روشن ہوگا، ساتھ ہی ملک دن بہ دن ترقی کرے گا، ہماری دعا ہے کہ بچہ امتحانات میں اچھے نمبروں سے پاس ہو اور گھر والوں کا نام روشن کرے۔