لیکن کیا واقعی میں نوجوت سنگھ سدھو کے ان دعوؤں میں کوئی حقیقت ہے؟ کیا طبی طور پر ادویات کے ساتھ ساتھ مریض کی خوراک میں ہلدی، لیموں پانی اور نیم کے پتوں کا استعمال کر کے کینسر کا علاج کیا جا سکتا ہے؟
گذشتہ ہفتے انڈیا کے معروف سابق کرکٹر اور سیاست دان نوجوت سنگھ سدھو نے دعویٰ کیا تھا کہ اُن کی اہلیہ نوجوت کور سدھو کینسر کے مرض سے صحتیاب ہو گئی ہیں اور انھوں نے اپنی خوراک میں بعض اشیا شامل کر کے (یعنی خوراک کی مدد سے) سٹیج فور کینسر پر قابو پا لیا۔
ان کے اس اعلان کے بعد اب چھتیس گڑھ سول سوسائٹی (سی سی ایس) نے نوجوت سنگھ سدھو کی اہلیہ کو 850 کروڑ روپے ہرجانے کا نوٹس جاری کیا ہے۔
انڈین میڈیا کے مطابق چھتیس گڑھ سول سوسائٹی کے کنوینر ڈاکٹر کلدیپ سولنکی نے تشویش کا اظہار کرتے ہوئے کہا کہ اس طرح کے جھوٹے دعوے لوگوں کو الجھا رہے ہیں اور ان میں ایلوپیتھک ادویات اور علاج کے بارے میں منفی سوچ پیدا کر رہے ہیں۔
یاد رہے کہ نوجوت سنگھ سدھو نے سوموار کہ روز اپنے گذشتہ بیان کی وضاحت بھی جاری کی تھی۔ انھوں نے سوشل میڈیا پر ایک ویڈیو پیغام میں عوام کو یقین دلایا کہ ان کی اہلیہ نے اپنے ڈائٹ پلان کو طبی ماہرین کی مشاورت سے اپنایا تھا۔ انھوں نے زور دیا کہ خوراک طبی علاج کا متبادل نہیں بلکہ اس میں معاون ہے۔
سدھو نے وضاحت کی کہ ان کی اہلیہ کے علاج میں سرجری، کیموتھراپی، اور ہارمونل تھراپی شامل ہیں جس میں خوراک ’اضافی علاج‘ کے طور پر کام کرتی ہے۔
سدھو نے مزید کہا کہ ’میں کہنا چاہتا ہوں کہ ڈاکٹر میرے لیے خدا کی طرح ہیں اور ڈاکٹر ہمیشہ سے میری ترجیح رہے ہیں۔ ہم نے جو کچھ بھی کیا، وہ ڈاکٹروں کی مشاورت اور باہمی تعاون کے ساتھ کیا۔‘
دوسری جانب ڈاکٹر سولنکی نے وراننگ دی ہے کہ کہ اگر نوجوت کور سدھو سات دن کے شواہد پیش نہیں کرتیں تو انکے خلاف قانونی کارروائی کی جائے گی۔
ڈاکٹر سولنکی نے اس بات پر زور دیا کہ غلط معلومات دوسرے مریضوں کی صحت کو خطرے میں ڈال رہی ہیں۔ انھوں نے نوجوت کور سدھو سے درخواست کی کہ وہ اپنے شوہر کے دعووں پر اپنا موقف واضح کریں۔
بی بی سی اردو اب واٹس ایپ پر: سبسکرائب کرنے کے لیے کلک کریں
نوجوت سدھو نے کیا کہا؟
انڈیا کے سابق کرکٹر اور پنجاب سے سیاستدان نوجوت سنگھ سدھو نے پریس کانفرنس کرتے ہوئے کہا تھا کہ اُن کی اہلیہ مکمل طور پر کینسر سے صحتیاب ہو گئی ہیں اور انھوں نے دعویٰ کیا کہ یہ سب کچھ اُن کی مخصوص غذا کی وجہ سے ہوا۔
نوجوت سنگھ سدھو نے بتایا تھا کہ ان کی اہلیہ کے علاج کے دوران نہ صرف کیموتھراپی ہوئی بلکہ ریڈیئیشن کے طریقہ علاج کو بھی اپنایا گیا تاہم اس کے ساتھ ساتھ انھوں نے تحقیق کر کے کچھ مخصوص اجزا کو اپنی اہلیہ کی غذا سے نکالا اور چند دیسی اور خالص چیزوں کو اُن کی غذا کا حصہ بنایا جس کے باعث وہ سٹیج فور کے کینسر سے صحتیاب ہوئیں۔
انھوں نے صحافیوں کو بتایا کہ ڈاکٹروں نے ان کی اہلیہ کے صحت یاب ہونے کے امکانات کو صرف چار سے پانچ فیصد قرار دیا تھا۔ نوجوت سنگھ سدھو نے دعویٰ کیا کہ اس دوران انھوں نے امریکہ کے ڈاکٹروں اور انڈیا کے ماہرین کینسر سے مشورے کرنے سمیت گھنٹوں میڈیکل تحقیق اور ایورویدک (دیسی طریقہ علاج) سے متعلق بہت مطالعہ کیا۔
انھوں نے کہا کہ روزانہ گھنٹوں پر محیط تحقیق کے مطالعے کے بعد انھوں نے اپنی اہلیہ کی غذا سے گندم کا آٹا، ریفائنڈ میدہ، کاربوہائیڈریٹس، چینی، دودھ، ریفائنڈ تیل وغیرہ سب ختم کر دیا۔
انھوں نہ دعویٰ کیا کہ چینی یا مٹھاس مرض کو بڑھانے کا کام کرتی ہے اور اگر کینسر کے مریض کے کھانے کے اوقات میں وقفہ بڑھا دیا جائے اور کاربوہائڈریٹس نہ دیے جائیں تو کینسر کے خلیے جسم سے ختم ہونے لگتے ہیں۔
انھوں نے یہ بھی دعویٰ کیا کہ ان کی اہلیہ کی غذا میں لیموں کا رس، سیب اور لیموں کا سرکہ، نیم کے پتے، کچی ہلدی، لہسن، ادرک، چقندر، تازہ اور کچی سبزیوں کا استعمال، ناریل کے تیل میں پکا کھانا، بادام کا رس یا دودھ اور دیسی مسالہ جات جن میں الائچی، کالی مرچ، دار چینی وغیرہ شامل تھے استعمال کی گئیں اور وہ ان چیزوں کے استعمال سے صحت یاب ہوئیں۔
لیکن کیا واقعی میں ان کے ان دعوؤں میں کوئی حقیقت ہے؟ کیا طبی طور پر ادویات کے ساتھ ساتھ مریض کی خوراک میں ہلدی، لیموں پانی اور نیم کے پتوں کا استعمال کر کے کینسر کا علاج کیا جا سکتا ہے؟
انڈیا کے ٹاٹا میموریل ہسپتال کے 262 موجودہ اور سابق کینسر ماہرین کے مطابق اس کا جواب نفی میں۔
ان ڈاکٹروں کی جانب سے جاری کردہ بیان میں کہا گیا کہ ’سوشل میڈیا پر ایک ویڈیو وائرل ہو رہی ہے جس میں ایک سابق کرکٹر اپنی اہلیہ کے کینسر کے علاج کے بارے میں بتا رہے ہیں۔‘
’ویڈیو کے کچھ حصوں کے مطابق، ہلدی اور نیم کے استعمال سے انھیں اپنے ’لاعلاج‘ کینسر کا علاج کرنے میں مدد ملی۔ ان بیانات کی تائید کے لیے کوئی میڈیکل یا سائنسی ثبوت نہیں۔‘
ٹاٹا میموریل کے کینسر کے ماہرین نے اپنے بیان میں کہا ہے کہ ’ ہم لوگوں سے گزارش کرتے ہیں کہ وہ غیر مصدقہ علاج پر عمل نہ کرتے ہوئے اپنے علاج میں تاخیر نہ کریں بلکہ اگر کسی کو اپنے جسم میں کینسر کی کوئی علامت محسوس ہو تو وہ ڈاکٹر سے مشورہ کریں، خصوصاً کینسر کے ماہر سے مشورہ لیں۔‘
ماہرین کو سدھو کے دعوؤں پر کیا اعتراض؟
کینسر کی ماہر ڈاکٹر کنوپریا بھاٹیہ، جو موہن دائی اوسوال ہسپتال میں کینسر کے علاج کی ماہر ہیں، کہتی ہیں کہ ’میرے کلینک میں کم از کم 30-40 فیصد لوگ ایسے آتے ہیں جنھیں طویل عرصے سے کینسر ہوتا ہے لیکن وہ علاج کے لیے جڑی بوٹیوں پر انحصار کر رہے ہوتے ہیں۔‘
انھوں نے کہا کہ ’آج بھی ملک کا ایک بڑا طبقہ زیادہ پڑھا لکھا نہیں ہے جس کی وجہ سے مریض اکثر طبی مشورہ لینے کی بجائے جڑی بوٹیوں کے علاج کا سہارا لیتے ہیں۔ وہ سوشل میڈیا پر جو کچھ دیکھتے ہیں اس پر جلدی یقین کر لیتے ہیں اور خود علاج کرنے کی کوشش کرتے ہیں۔ یہ بہت نقصان دہ ہو سکتا ہے۔ کینسر قابل علاج ہے بشرطیکہ اس کا صحیح وقت پر علاج شروع کر دیا جائے۔‘
ڈاکٹر کنوپریا بھاٹیہ کہتی ہیں کہ ’اگر کسی کو کینسر کی کوئی علامت ہو تو فوری طور پر طبی مشورہ لینا ضروری ہے۔ خود سے اپنا علاج نہ کریں اور سوشل میڈیا پر موجود غلط معلومات پر عمل نہ کریں اور نہ ہی کوئی ایسی غذا شروع کریں۔ بروقت تشخیص اور طبی مدد نہ لینے سے کینسر کے مرض میں اضافہ ہو سکتا ہے۔‘
پاکستان میں فیصل آباد میڈیکل یونیورسٹی سے منسلک آنکولوجسٹ ڈاکٹر محمد طاہر بشیر بھی دیگر ماہرین سے اتفاق کرتے ہوئے کہتے ہیں کہ بظاہر سدھو کے دعوے کہانیوں پر مبنی ہیں۔
ان کا کہنا تھا کہ ’یہ درست ہے کہ صحت مند زندگی گزارنے اور صحت بخش غذائیں کھانے سے کینسر سے بچا جا سکتا ہے‘ تاہم ان کا کہنا ہے کہ ’لیکن کسی کو کینسر کی تشخیص کے بعد اس کا علاج شروع کرنے میں تاخیر نہیں کرنی چاہیے اور نہ کوئی اور متبادل طریقہ علاج آزمانا چاہیے۔‘
ان کے مطابق جڑی بوٹیوں، بیجوں یا دیگر قدرتی اجزا کا استعمال مریضوں کی علامت کو بہتر کرنے کے لیے استعمال کیا جا سکتا ہے لیکن ’یہاں یہ ثابت کرنے کے لیے سائنسی شواہد کی کمی ہے جس سے یہ معلوم ہو سکے کہ یہ اجزا کسی میڈیکل طریقہ علاج کا متبادل ہو سکتے ہیں۔‘
انھوں نے تنبیہ کی کہ ’سائنسی طبی امداد سے انکار کرنا یا آنکولوجسٹ کی ہدایات کو نظر انداز کرنا مریضوں کی جان کے لیے خطرناک ہوسکتا ہے۔‘
ڈاکٹرز غذا کے بارے میں کیا کہتے ہیں؟
ماہرین صحت کا کہنا ہے کہ اگرچہ مناسب خوراک کینسر کے علاج کا اہم حصہ ہے تاہم اس مرض کا علاج محض خوراک اور طرز زندگی میں تبدیلی سے نہیں کیا جا سکتا۔
انڈین پنجاب کے محکمہ صحت کے ڈپٹی ڈائریکٹر ڈاکٹر جسبیر اولکھ کا کہنا ہے کہ ’ہماری کھانے پینے کی عادات بہت خراب ہو چکی ہیں۔ نوجوت سنگھ نے پریس کانفرنس میں خوراک اور ان میں ملاوٹ سے متعلق باتیں غلط نہیں کہیں۔ اگر ہم چند سال پیچھے جائیں تو ہم ان سادہ چیزوں کو روزانہ کی بنیاد پر کھاتے تھے۔‘
ڈاکٹر جسبیر اولکھ کہتے ہیں کہ ’پہلے زمانے میں لوگ غروب آفتاب کے بعد کھانا نہیں کھاتے تھے اور پھر صبح کا پہلا کھانا صبح 10 بجے کے قریب کھاتے تھے، جسے اب انٹرمیٹنٹ فاسٹنگ کہا جاتا ہے، یہ تمام چیزیں صحت کے لیے اچھی ہیں، لیکن یوں کہنا کہ یہ کینسر کا علاج ہیں تو یہ غلط ہو گا۔‘
کینسر کے علاج میں کھانے پینے کی چیزیں کتنی ذمہ دار ہیں؟
ڈاکٹر کنوپریا بھاٹیہ کہتی ہیں کہ صرف پانچ فیصد سے بھی کم معاملات میں کینسر کی وجہ معلوم ہو پاتی ہے۔ وہ کہتی ہیں کہ ’کینسر کی وجہ عام طور پر نامعلوم ہی رہتی ہے لیکن بہت سے حالیہ مطالعات سے پتہ چلتا ہے کہ کینسر ہماری گٹ صحت ’یعنی آنتوں کی صحت‘ کی وجہ سے ہوتا ہے۔
ڈاکٹر کنوپریا بھاٹیہ کے مطابق ’اگر ہم کینسر کے علاج کی بات کریں تو اسے چار حصوں میں تقسیم کیا گیا۔ پہلا سرجری، دوسرا کیموتھراپی، تیسرا ریڈیئیشن اور چوتھا امیونو تھراپی ہے۔‘
وہ کہتی ہیں کہ ’دوران علاج یہ ضروری ہے کہ غذا یا خوراک ڈاکٹر یا کینسر کے ماہر کے ذریعہ تجویز کروائی جائے۔ آنکولوجی کی تعلیم کے دوران ہمیں علاج میں ضروری اچھی خوراک کے بارے میں سکھایا جاتا ہے۔ اس لیے مریضوں سے گزارش ہے کہ سماجی رویوں سے متاثر نہ ہوں۔ خود سے کچھ بھی کھانا یا پینا شروع نہ کریں کیونکہ ایسا کرنا نقصان دہ ہوسکتا ہے۔‘
