Milaun Kis Ki Aankhon Se Main Apni Chashm-E-Hairan Ko

Milaun kis ki ankhon se main apni chashm-e-hairan ko
ayaan jab har jagah dekhun usi ke naz-e-pinhan ko

tujhe ai shama kya dekhen zamane ko dikhana hai
hamen juun kaghaz-e-atish-zada aur hi charaghan ko

na tanha kuchh yahi atfal dushman hain divanon ke
bhare hai koh bhi dekha to yaan pattharon se daman ko

jhamakte hain sitaron ki tarah surakh hasti ke
chhupaya go ki juun khurshid men dagh-e-numayan ko

na vajib hi kaha jaave na sadiq mumtana us par
kiya tashkhis kuchh ham ne na hargiz shakhs-e-imkan ko