Wajd Ho Bulbul-e-taswir Ko Jis Ki Bu Se

wajd ho bulbul-e-taswir ko jis ki bu se
us se gul-rang ka dawa kare phir kis roo se

shama ke rone pe bas saf hansi aati hai
aatish-e-dil kahin kam hoti hai chaar ansu se

ek din wo tha ki takiya tha kisi ka bazu
ab sar uThta hi nahin apne sar-e-zanu se

naza mein hun meri mushkil karo asan yaron
kholo tawiz-e-shifa jald mere bazu se

shoKHi-e-chashm ka tu kis ki hai diwana 'anis'
aankhen malta hai jo yun naqsh-e-kaf-e-ahu se