حکومت سندھ نے عوام کے لیے ایک اور خوشخبری کا اعلان کر دیا ہے۔ آئندہ ہفتے سے کراچی میں ڈبل ڈیکر بسیں اور نئی الیکٹرک بسیں چلائی جائیں گی۔ اس کے علاوہ سندھ کے دیگر اضلاع میں پیپلز بس سروس کے نئے روٹس بھی جلد شروع کیے جائیں گے۔
یہ اعلان سندھ کے سینئر وزیر شرجیل انعام میمن کی زیر صدارت ہونے والے اجلاس میں کیا گیا جس میں سیکریٹری ٹرانسپورٹ، ایم ڈی ایس ایم ٹی اے کنول نظام بھٹو، سی ای او ٹرانس کراچی فواد غفار سومر، اور یلو لائن بی آر ٹی کے پی ڈی ضمیر عباسی بھی موجود تھے۔ اجلاس میں یلو لائن بی آر ٹی اور ریڈ لائن بی آر ٹی کے ترقیاتی کام کی پیش رفت پر بریفنگ دی گئی۔
سینئر وزیر شرجیل انعام میمن نے کہا کہ کراچی میں ڈبل ڈیکر بسوں کے ساتھ نئے ای وی بس روٹس بھی جلد فعال ہوں گے اور حکومت دسمبر تک ای وی ٹیکسی سروس بھی شروع کرنے کا ارادہ رکھتی ہے۔ انہوں نے مزید بتایا کہ حالیہ مالی سال میں مزید پانچ سو بسیں لانے کا منصوبہ بھی زیر غور ہے۔
شرجیل میمن نے ٹرانسپورٹ حکام کو ہدایت دی کہ نئے روٹس کے حوالے سے تمام آپریشنل تیاریاں مکمل کی جائیں اور یلو لائن بی آر ٹی کے ترقیاتی کام میں تیزی لائی جائے۔ تاج حیدر پل کے دوسرے حصے کے کام کا آغاز جلد کیا جائے گا جبکہ پل پر دو طرفہ ٹریفک آج سے بحال کر دی گئی ہے۔
سینئر وزیر نے خواتین اور طالبات کے لیے اسکوٹیز چلانے کی تربیت کے آغاز کا بھی اعلان کیا تاکہ ان کے لیے محفوظ اور باقاعدہ ٹرانسپورٹ سہولیات فراہم کی جا سکیں۔