میئر کراچی بیرسٹر مرتضیٰ وہاب نے شہر کی تمام 246 یونین کمیٹیوں کے گزشتہ تین مالی سالوں کا خصوصی مالیاتی آڈٹ کرانے کی ہدایت جاری کردی ہے۔ اس سلسلے میں میئر ہاؤس سے جاری مراسلہ ڈائریکٹر جنرل لوکل کونسل آڈٹ سندھ کو ارسال کیا گیا ہے۔
مراسلے میں کہا گیا ہے کہ حکومتِ سندھ کی جانب سے کراچی کی یونین کمیٹیوں کو ماہانہ 1.2 ملین روپے فراہم کیے جا رہے ہیں، جس پر خطیر رقم خرچ ہورہی ہے، تاہم اب تک یونین کمیٹیوں کے فنڈز کے استعمال کا کوئی مؤثر آڈٹ موجود نہیں۔
مراسلے کے مطابق یونین کمیٹیوں کی کارکردگی جانچنے اور مالی امور میں شفافیت یقینی بنانے کے لیے ضروری ہے کہ ان فنڈز کا مفصل آڈٹ کیا جائے تاکہ معلوم ہوسکے کہ رقم کہاں، کیسے اور کتنی استعمال ہوئی؟
میئر کراچی نے ہدایت کی ہے کہ گزشتہ تین برس کا اسپیشل آڈٹ جلد از جلد مکمل کرکے رپورٹ پیش کی جائے۔ اس مراسلے کی کاپی آڈیٹر جنرل آف پاکستان اور پبلک اکاؤنٹس کمیٹی سندھ کو بھی ارسال کی گئی ہے۔