اقوام متحدہ کی سلامتی کونسل کے اجلاس میں پاکستان نے افغان سرزمین کے دہشت گردی کے لیے استعمال ہونے پر شدید تشویش کا اظہار کیا ہے۔
پاکستان کے مستقل مندوب عاصم افتخار نے اجلاس سے خطاب کرتے ہوئے کہا کہ افغان سرزمین دہشت گردی کی منصوبہ بندی اور کارروائیوں کے لیے استعمال ہو رہی ہے، جو نہ صرف پاکستان بلکہ پورے خطے کے امن و استحکام کے لیے سنگین خطرہ ہے۔
انہوں نے بتایا کہ حالیہ دہشت گرد حملوں میں 80 بے گناہ پاکستانی جان کی بازی ہار چکے ہیں اور ان حملوں کی منصوبہ بندی افغان سرزمین پر کی گئی۔ ان کا کہنا تھا کہ یہ گروہ مسلسل پاکستان کے خلاف دہشت گرد کارروائیوں میں ملوث رہے ہیں۔
خطاب کے دوران عاصم افتخار احمد نے افغانستان میں جاری انسانی بحران اور خواتین کے حقوق کی صورتحال پر بھی گہری تشویش کا اظہار کیا اور عالمی برادری پر زور دیا کہ وہ مسئلے کے حل کے لیے مؤثر اور فوری اقدامات کرے۔