جمعیت علمائے اسلام کے سربراہ مولانا فضل الرحمان کی زیرِ صدارت پارٹی کی مرکزی مجلسِ شوریٰ کا دو روزہ غیر معمولی اجلاس آج مورخہ 4 اپریل کو پشاور کے مفتی محمود مرکز میں شروع ہو رہا ہے، جو 5 اپریل تک جاری رہے گا۔
ترجمان جے یو آئی اسلم غوری کے مطابق مولانا فضل الرحمان، اسلم غوری اور پارٹی کے دیگر مرکزی قائدین پشاور پہنچ چکے ہیں، جبکہ ملک بھر سے اراکینِ مرکزی مجلسِ شوریٰ بھی اجلاس میں شرکت کے لیے آج پشاور پہنچ جائیں گے۔
اس اہم اجلاس کا ایجنڈا انتہائی وسیع ہے جس میں ملک کی موجودہ سیاسی صورتِ حال اور مستقبل کی سیاسی سمت کا تعین کیا جائے گا۔ اجلاس کے دوران مجموعی حکومتی کارکردگی اور اہم عوامی مسائل پر تفصیلی غور کیا جائے گا۔
علاوہ ازیں اجلاس میں علاقائی اور بین الاقوامی امور کو بھی خصوصی اہمیت دی جائے گی، جن میں مشرقِ وسطیٰ کی صورتحال، امریکا-اسرائیل جنگ کے خطے پر اثرات، اور پاک-افغان سرحدی صورتِ حال سمیت اس سے جڑے مضمرات کا تفصیلی جائزہ لیا جائے گا۔
توقع کی جا رہی ہے کہ اس اجلاس کے اختتام پر پارٹی کے آئندہ کے لائحہ عمل کا اعلان کیا جائے گا۔