پی ڈی ایم اے نے بارشوں اور فلش فلڈ کے باعث صوبے کے مختلف اضلاع میں ہونے والے جانی و مالی نقصانات کی رپورٹ جاری کردی ہے۔ رپورٹ کے مطابق حالیہ بارشوں اور سیلابی ریلوں کے نتیجے میں مختلف حادثات میں اب تک 313 افراد جان کی بازی ہار چکے ہیں جبکہ 156 افراد زخمی ہوئے ہیں۔
تفصیلات کے مطابق جاں بحق ہونے والوں میں 263 مرد، 29 خواتین اور 21 بچے شامل ہیں، جبکہ زخمیوں میں 123 مرد، 23 خواتین اور 10 بچے شامل ہیں۔ بارشوں اور فلش فلڈ کے باعث مجموعی طور پر 159 مکانات متاثر ہوئے، جن میں سے 97 کو جزوی نقصان پہنچا جبکہ 62 گھر مکمل طور پر منہدم ہو گئے۔
رپورٹ میں بتایا گیا ہے کہ سیلاب سے سب سے زیادہ متاثرہ ضلع بونیر رہا، جہاں اب تک مجموعی طور پر 208 افراد جاں بحق ہوئے۔ یہ المناک حادثات صوبے کے مختلف اضلاع بشمول سوات، بونیر، باجوڑ، تورغر، مانسہرہ، شانگلہ اور بٹگرام میں پیش آئے۔
محکمہ موسمیات کے مطابق 17 سے 19 اگست کے دوران شدید بارشوں کا امکان ظاہر کیا گیا ہے، جبکہ موجودہ بارشوں کا سلسلہ 21 اگست تک وقفے وقفے سے جاری رہنے کی پیش گوئی کی گئی ہے۔
وزیراعلیٰ خیبرپختونخوا کی خصوصی ہدایت پر متاثرہ اضلاع کے لیے امدادی فنڈز جاری کر دیے گئے ہیں، جبکہ متعلقہ اداروں کو امدادی سرگرمیاں تیز کرنے کے احکامات بھی دیے گئے ہیں۔