نئی دہلی۔4مئی (اے پی پی):بھارت کی ریاست اتراکھنڈ کے علاقے مسوری میں ایک گاڑی پہاڑ سے نیچے گرنے کے باعث 5افراد ہلاک ہوگئے ۔بھارتی میڈیا کے مطابق مقامی پولیس ترجمان نے میڈیا کو بتایا کہ گزشتہ روز چوناکھل جھاڑیپانی روڈ پر مقامی وقت کے مطابق صبح تقریباً 5 بجے طالبعلوں کے ایک گروپ کو تفریح دورے پر لے جانے والی ایک گاڑی بے قابو ہو کر پہاڑ سے نیچے گر گئی ۔انہوں نے بتایا کہ حادثے کا شکار ہونے والی گاڑی میں 4 لڑکوں اور دو لڑکیوں سمیت کل 6 افراد سوار تھے جن میں سے 5 کی موت ہو گئی اور ایک لڑکی شدید زخمی بتائی جاتی ہے۔انہوں نے بتایا کہ مسوری فائر سروس اور ایس ڈی آر ایف کی ٹیموں نے موقع پر پہنچ کر بچاؤ کا کام شروع کرتے ہوئے زخمی اور ہلاک ہونے والوں کو مسوری کے سب ڈسٹرکٹ ہسپتال منتقل کر دیا ہے۔انہوں نے مزید بتایا کہ مسوری پولیس حادثے کی وجوہات کے بارے میں تحقیقات کر رہی ہے۔