کہیں والد کے جنازے میں شرکت کے لئے آنے والے دو سگے بھائی زندگی کی بازی ہار گئے اور کہیں والد اپنے بیٹے کا صدمہ برداشت نہ کر سکا، باپ نے جیسے ہی بیٹے کی میت دیکھی تو وہ بھی دنیا چھوڑ گیا۔ یہ دونوں حادثے بلوچستان میں شہید ہونے والوں کے گھر والوں کے ساتھ پیش آئے۔
یہ واقعہ بھی بلوچستان میں دہشتگردی سے ہلاک ہونے والوں کے گھر والوں کے ساتھ پیش آیا ہے۔ پنجاب کے ضلع میاں چنوں کے نواحی گائوں سے تعلق رکھنے والے غلام سعید کی میت جب انکے گھر پہنچی تو ان کے والد غلام سرور حرکت قلب بند ہونے کی وجہ سے موقع پر ہی دم توڑ گئے۔ غلام سرور کافی عرصہ سے بیمار تھے، بیماری کی اطلاع پر بیٹا چھٹی لے کر گھر آرہا تھا۔ دونوں باپ بیٹے کی نماز جنازہ ایک ہی وقت پر گاؤں 72 پندرہ ایل میں ادا کی گئی۔ نماز جنازہ میں فوج کے دستہ کے علاوہ سیاسی، سماجی، پولیس اور عوام نے بڑی تعداد میں شرکت کی۔ اس سے پہلے دو بھائیوں کا جنازہ ادا کیا گیا تھا جو اپنے والد کے جنازے میں شرکت کیلئے گئے تھے۔
بلوچستان کے علاقے لورالائی میں جمعرات کی رات کو دہشتگردوں نے کوئٹہ سے لاہور جانے والی 2 کوچز میں سوار 9 مسافروں کو اغوا کرنے کے بعد قتل کر دیا تھا، جن کی میتیں پنجاب میں انکے آبائی علاقوں میں منتقل کرنے کے بعد تدفین کی گئی۔