پاکستان پیپلز پارٹی کے رہنما اور صوبائی وزیر سعید غنی کے بھائی ٹاؤن چیئرمین فرحان غنی ملک سے باہر چلے گئے۔
خاندانی ذرائع کے مطابق فرحان غنی عمرہ ادائیگی کے لیے سعودی عرب روانہ ہوئے ہیں۔ یاد رہے کہ فرحان غنی کو 23 اگست کو دہشت گردی کے کیس میں سلاخوں کے پیچھے جانا پڑا تھا اور بعدازاں مقدمہ مدعی کی جانب سے کیس واپس لینے پر انہیں پولیس نے رہا کردیا تھا۔
ذرائع کا کہنا ہے کہ فرحان غنی عمرے کی ادائیگی کے بعد امریکا بھی جائیں گے۔
واضح رہے کہ کراچی کی انسداد دہشت گردی کی عدالت نے فیروزآباد پولیس کی جانب سے فرحان غنی اور دیگر دو ملزمان کی رہائی کی رپورٹ پیش کرنے پر برہمی کا اظہار کرتے ہوئے انہیں 2 ستمبر کو عدالت میں پیش کرنے کا حکم دے رکھا ہے۔