کراچی میں ایم اے جناح روڈ پر آتشبازی کے گودام و کارخانے میں ہونے والے دھماکے کے بعد وہاں سے برآمد ہونے والا پانچ ہزار کلوگرام دھماکا خیز مواد بم ڈسپوزل یونٹ نے تلف کر دیا۔
پولیس ذرائع کے مطابق چند روز قبل گودام میں ہونے والے دھماکے میں چھ افراد جاں بحق اور تیس سے زائد زخمی ہوئے تھے۔ واقعے کے بعد بھی گودام میں پانچ ہزار کلوگرام سے زائد بارودی مواد موجود تھا۔ عدالت نے حکم دیا تھا کہ ربیع الاول کے جلوسوں سے قبل تمام ذخیرہ شدہ آتش گیر مواد کو فوری طور پر ضائع کیا جائے۔
بم ڈسپوزل اسکواڈ کے مطابق برآمد مواد کو نادرن بائی پاس پر منتقل کرکے سیفٹی فیوز ڈیوائس کے ذریعے تلف کیا گیا۔ حکام کا کہنا ہے کہ یہ کارروائی عدالت کے حکم پر اور ربیع الاول کے جلوسوں سے قبل سیکیورٹی اقدامات کے تحت کی گئی۔