اسلام آباد: فیڈرل انویسٹی گیشن ایجنسی (ایف آئی اے) امیگریشن ونگ نے اسلام آباد انٹرنیشنل ایئرپورٹ پر بروقت کارروائی کرتے ہوئے انسانی اسمگلنگ کی کوشش ناکام بنا دی۔
ترجمان ایف آئی اے کے مطابق اسلام آباد انٹرنیشنل ایئرپورٹ پر ایف آئی اے امیگریشن کی بڑی کارروائی میں پانچ مسافروں کو آف لوڈ کر دیا گیا جو جعلسازی کے ذریعے بیرون ملک جانے کی کوشش کر رہے تھے۔ مسافر تھائی لینڈ وزٹ ویزے پر ہانگ کانگ جا رہے تھے۔ ابتدائی تفتیش میں پتہ چلا کہ خاتون مسافر بشریٰ کا صرف ایک بیٹا امجد علی ہے جبکہ باقی تین افراد (علیزے شاہین، محمد عدنان، ذیشان علی خان) اس سے کسی رشتے میں نہیں۔ ایجنٹ نے نادرا ریکارڈ میں ردوبدل کر کے انہیں بشریٰ کے "بچے" ظاہر کیا اور صوابی کا پتہ درج کیا۔
مسافروں کے خاندان نے ایجنٹ کو فی کس ڈیڑھ کروڑ روپے ادا کیے تھے تاکہ انہیں غیر قانونی طور پر باہر بھیجا جا سکے۔ ایف آئی اے کے مطابق نادرا ریکارڈ میں جعلسازی اور ایئرپورٹ سہولت فراہم کرنے والے نیٹ ورک کے خلاف تحقیقات جاری ہیں اور مزید انکشافات کی توقع ہے۔