جہاں چلچلاتی دھوپ اور جھلسا دینے والی گرمی نے سب کو پریشان کیا ہوا ہے وہیں جگہ جگہ ٹھیلوں پر بکتے مختلف رنگوں کے پھل اور سبزیاں اپنی بہار دکھا رہے ہیں۔ کھیرا بھی ایک ایسی ہی سبزی ہے جو نہ صرف اپنے اندر بے پناہ فائدے سموئے ہوئے بلکہ اس کے بیجوں میں بھی صحت کا خزانہ چھپا ہوا ہے۔ آج کے اس آرٹیکل میں ہم آپ کو بتائیں گے کہ کھیرا اور اس کے بیج کھانے سے ہمیں کیا فائدے حاصل ہوسکتے ہیں۔
چہرے کی خوبصورتی میں اضافہ
کھیرا چکنی جلد والوں کے لئے ایک بیوٹی پارلر سے کم نہیں۔ اس کو کاٹ کر براہِ راست چہرے پر ملیں اور تھوڑی دیر خشک ہونے دیں پھر سادے پانی سے چہرہ دھو لیں فالتو چکنائی جذب ہوجائے گی۔ کھیرے کے قتلے پتلے کاٹ کر آنکھوں پر رکھیں تو یہ آنکھوں کو تراوٹ بخشتا ہے اور خون کی روانی بہتر کرکے حلقے کم کرنے میں مدد کرتا ہے۔ کھیرے کو کچل کر، ایلو ویرا کا گودا اور تھوڑا عرق گلاب ملا کر چہرے پر لگانے سے جلد کی رنگت نکھرتی ہے، سورج سے پڑنے والی سیاہ جلد کو صاف کرتا ہے اور داغ دھبے اور دانے بھی کم کرتا ہے۔
غذائی اہمیت
کھیرے میں وٹامن کے، وٹامن سی، پوٹاشیم، پینٹوتھینک ایسڈ اور کاپر بھرپور مقدار میں موجود ہوتا ہے۔ یہ سبزی بنیادی طور پر تربوز اور کدو کے خاندان سے تعلق رکھتی ہے اس لئے اس میں ان پھلوں جیسی افادیت ہوتی ہے۔ کھیرے میں پانی بھی کافی مقدار میں ہوتا ہے اس لئے یہ جسم میں پانی کی کمی کو پورا کرتا ہے۔
کھیرے کے بیج
کچھ لوگوں کو کھیرا کھانا پسند نہیں ہوتا اس لئے وہ کھیرے کے بجائے اس کے بیج کا استعمال کرسکتے ہیں۔ کھیرے کے خشک بیج بازار میں آسانی سے مل جاتے ہیں یا پھر گھر میں بھی کھیرا کاٹتے ہوئے الگ کیے جاسکتے ہیں۔ کھیر کے بیج پیٹ کے کیڑے ختم کرنے میں بہت مفید ہیں اس کے علاوہ یہ معدنیات اور وٹامنز سے بھرپور ہوتے ہیں۔ کھیرے کے بیج تاثیر میں ٹھنڈے ہوتے ہیں اور ان کا ایک فائدہ یہ بھی ہے کہ کھیرے کے بیج سلاد میں اوپر سے چھڑک کر بھی کھائے جاسکتے ہیں۔