وزیر اعظم شہباز شریف نے گوادر میں ہر گھر کو پینے کا صاف پانی مہیا کرنے اور سولرپینلز کے ذریعے بجلی کی فراہمی یقینی بنانے کی ہدایت کی ہے۔ انہوں نے چینی سرمایہ کاروں کو ہر ممکن تعاون کی یقین دہانی کراتے ہوئے وفاقی وزیر منصوبہ بندی احسن اقبال کو جامع مذاکرات کرنے اور تمام مسائل کے حل کے لئے واضح روڈ میپ تیار کرنے کی بھی ہدایت کی۔
انہوں نے یہ ہدایات جمعہ کو چینی کمپنیوں کے وفد سے ملاقات کے دوران دیں۔ وزیر اعظم نے انہیں گوادر شہر میں ڈی سیلینیشن پلانٹ لگا کر ہر گھر کو پینے کا صاف پانی مہیا کرنے، اور سولرپینلز کا استعمال کر کے بجلی کی فراہمی کو یقینی بنانے کہ ہدایت کی۔انہوں نے گوادر ایئر پورٹ کی جلد از جلدتکمیل اور گوادر پورٹ کو دنیا کی مصروف ترین اور منافع بخش بندرگاہ بنانے پربھی زور دیا۔
وزیر اعظم نے اس مقصد کے لئے چینی سرمایہ کاروں کو ہر ممکن تعاون کی یقین دہانی کرائی۔ انہوں نے وفاقی وزیر منصوبہ بندی و ترقی احسن اقبال کو اس سلسلے میں چینی سرمایہ کاروں کے ساتھ جامع مذاکرات کرنے اور تمامُ مسائل کے حل کے لئے واضح روڈ میپ تیار کرنے کی ہدایت بھی کی۔ ملاقات میں وفاقی وزیر منصوبہ بندی و ترقی احسن اقبال، وفاقی وزیر انسداد منشیات نواب زادہ شاہ زین بگٹی، معاونین خصوصی طارق فاطمی اور فہد حسین کے علاوہ دیگر اہم سیاسی شخصیات بھی موجود تھیں۔