جدہ۔22اپریل (اے پی پی):سعودی عرب کے فلم کمیشن کے بورڈ آف ڈائریکٹرز نے سینما لائسنس اور ٹکٹوں کی فیس میں کمی کا فیصلہ کیا ہے ۔عاجل نیوز کے مطابق فلم کمیشن نے اپنے ایکس اکاؤنٹ پر بیان میں کہا ہے کہ سینما لائسنس اور ٹکٹوں کی مالیاتی فیس میں کمی کا مقصدملکی فلموں کی موجودگی کو بڑھانا، سینما سکرینوں کی تعداد میں اضافہ، پروموشنل آفرز اور ٹکٹ کی قیمتوں کو کم کرنا ہے۔
ان کا کہنا تھا کہ یہ سینما کے شعبے کی سپورٹ، کمپنیوں کےلیے سکرینز اور اقتصادی شراکت کی شرح میں اضافے اور مملکت میں فلم ثقافت کی حوصلہ افزائی کی کوشش ہے۔کمیشن نے ایک یا اس سے زیادہ فلموں کو مستقل یا عارضی بنیاد پر دکھانے کے لیے سینما لائسنس فیس میں بھی کمی کی ہے۔فلم کمیشن نے کہا ہےکہ سینما لائسنس اور ٹکٹ فیس میں کمی بین الاقوامی اوسط کے مطابق اس شعبے کی پائیداری اور ترقی میں سینما کمپنیوں کی مدد کے لیے کی گئی ہے۔