قاہرہ۔12مئی (اے پی پی):مصر نے غزہ کی پٹی میں خراب حالات کی ذمہ داری اسرائیلی حملوں پر ڈالتے ہوئے رفح کراسنگ کے ذریعے امداد کی ترسیل کے لیے اس کے ساتھ تعاون سے انکار کردیا ہے۔ العربیہ نے بتایا کہ قاہرہ چینل کے مطابق مصر نے غزہ کی پٹی میں حالات کی خرا بی کا ذمہ دار اسرائیلی حملے کو قرار دیتے ہوئے رفح کراسنگ کے ذریعے امداد کے داخلے بارے اس کے ساتھ تعاون سے انکار کر دیا ہے۔اس سے قبل اسرائیلی میڈیا نے رپورٹ میں بتایا تھا کہ مصری حکام نے سی آئی اے کے ڈائریکٹر ولیم برنز کو اسرائیل کو رفح آپریشن روکنے کی ضرورت سے آگاہ کیا ہے تاکہ امن معاہدہ منسوخ نہ کیا جائے۔
اسرائیلی اخبار معاریف نے رپورٹ کیا کہ مصری حکام نے حال ہی میں مصر کا دورہ کرنے والے امریکی انٹیلی جنس ڈائریکٹر کو اسرائیل پر شدید دباؤ ڈالنے اور اسے رفح میں اپنا آپریشن ختم کرنے اور سنجیدگی سے مذاکرات کی طرف واپس آنے پر مجبور کرنے کی ضرورت سے آگاہ کیا اور ایسا نہ ہونے پر اسرائیل کے ساتھ مصر کے امن معاہدے کو منسوخ ہوجانے کے امکان کا بھی بتایا۔اخبار نے یہ بھی اطلاع دی ہے کہ غزہ پر جنگ کے آغاز کے بعد پہلی مرتبہ مصر امدادی ٹرک ڈرائیوروں سے رفح کراسنگ کے اپنی سائیڈ کے علاقے کو خالی کرنے کے لیے کہہ رہا اور سکیورٹی صورتحال کے خراب ہونے کے خدشے کے پیش نظر اپنی سائیڈ پر حفاظتی اقدامات کو مزید مضبوط کر رہا ہے۔