شارجہ کرکٹ اسٹیڈیم میں سہ فریقی ٹی ٹوئنٹی سیریز 29 اگست سے 7 ستمبر تک منعقد ہوگی، جس میں پاکستان، افغانستان اور میزبان متحدہ عرب امارات کی ٹیمیں حصہ لیں گی۔ اس کے فوراً بعد 8 ٹیموں پر مشتمل ایشین کرکٹ کونسل (اے سی سی) کا ایشیا کپ ٹی ٹوئنٹی ٹورنامنٹ 9 سے 28 ستمبر تک ابوظہبی اور دبئی میں کھیلا جائے گا۔ اس ایونٹ میں پاکستان کو گروپ اے میں رکھا گیا ہے، جہاں اس کا مقابلہ بھارت، عمان اور متحدہ عرب امارات سے ہوگا۔
پاکستان کرکٹ بورڈ (پی سی بی) نے دونوں ایونٹس کے لیے 17 رکنی اسکواڈ کا اعلان کر دیا ہے۔ ٹیم کی قیادت سلمان علی آغا کریں گے۔ دیگر کھلاڑیوں میں ابرار احمد، فہیم اشرف، فخر زمان، حارث رؤف، حسن علی، حسن نواز، حسین طلعت، خوشدل شاہ، وکٹ کیپر محمد حارث، محمد نواز، محمد وسیم جونیئر، صاحبزادہ فرحان، صائم ایوب، سلمان مرزا، شاہین شاہ آفریدی اور صفیان مقیم شامل ہیں۔