بکوٹ سرکل کی عوام نے احتجاجاً کوہالہ انٹری پوائنٹ مکمل طور پر بند کردیا ہے، جس کی وجہ سے کاروباری حضرات اور سیاح کشمیر جانے سے اجتناب کر رہے ہیں۔
علاقے کے عوام نے یہ احتجاج پاکستان تحریک انصاف کے ایم این اے علی اصغر خان (صاحبزادہ ایئرمارشل ریٹائر اصغر خان) اور سابق صوبائی وزیر نزیر عباسی کے خلاف کیا ہے۔ عوام کا موقف ہے کہ منتخب نمائندے حلقے کی تعمیر و ترقی میں مکمل طور پر ناکام ہیں اور اپنی ذاتی مفادات اور دوستوں کو نوازنے کی پالیسی پر عمل کر رہے ہیں۔
شہریوں نے بتایا کہ حلقے میں سڑکیں خستہ حالی کا شکار ہیں، طبی سہولیات نہ ہونے کے برابر ہیں، اسکولوں میں اسٹاف کی کمی ہے اور دیگر اہم مسائل کے حل میں ایم این اے اور ایم پی اے کی غیر دلچسپی واضح ہے۔
علاقے کی عوام کا کہنا ہے کہ منتخب نمائندے بنیادی سہولیات کی فراہمی میں ناکام رہے ہیں، جس کے خلاف احتجاج کا آغاز کیا گیا ہے اور سڑکیں بند کر کے اپنا مطالبہ منوانے کی کوشش کی جا رہی ہے۔