سپریم کورٹ آف پاکستان نے فوت شدہ سرکاری ملازمین کی پنشن اور مراعات سے متعلق اہم فیصلہ جاری کرتے ہوئے قرار دیا ہے کہ متوفی ریٹائرڈ ملازم کی پنشن اور دیگر مراعات کی قانونی حق دار بیوہ یا قانون کے تحت نامزد شخص ہوگا، صرف قانونی وارث ہونے کی بنیاد پر بہن بھائی پنشن کے حقدار نہیں بن سکتے۔
چیف جسٹس پاکستان یحییٰ آفریدی کی سربراہی میں جاری کیے گئے چار صفحات پر مشتمل فیصلے میں کہا گیا ہے کہ پنشن کی ادائیگی متعلقہ قوانین اور ادارے کے سروس رولز کے مطابق کی جائے گی، نہ کہ صرف وراثتی بنیاد پر۔
عدالت نے واضح کیا کہ فوت شدہ ملازم کی پنشن اور مراعات کی تقسیم کا تعین متعلقہ قوانین کے تحت ہوگا، اس لیے بہن بھائی صرف قانونی وارث ہونے کی بنیاد پر پنشن کے حق دار قرار نہیں دیے جا سکتے۔
سپریم کورٹ نے پیسکو کے ایک فوت شدہ ملازم کے بہن بھائیوں کی جانب سے وراثتی سرٹیفکیٹ جاری کرنے کی اپیل مسترد کرتے ہوئے پشاور ہائی کورٹ کا فیصلہ برقرار رکھا۔